وپەك+ ەلدەرى قىركۇيەكتەن باستاپ مۇناي ءوندىرۋدىڭ ماقساتتى كولەمىن كەزەكتى رەت ارتتىرۋدى كەلىسۋى ىقتيمال. مۇنداي شەشىم اليانستىڭ 2 تامىزداعى وتىرىسىندا قابىلدانۋى مۇمكىن، دەپ تالقىلاۋ بارىسىمەن تانىس ءۇش دەرەككوز حابارلادى، دەپ جازادى infohub.kz سايتى.
Reuters دەرەگىنشە، ەرىكتى تۇردە ءوندىرىستى قىسقارتۋعا قاتىسىپ جۇرگەن جەتى مەملەكەت — ساۋد ارابياسى، رەسەي، يراك، كۋۆەيت، الجير، قازاقستان جانە ومان — كۆوتالاردى تاۋلىگىنە شامامەن 188 مىڭ باررەلگە ارتتىرۋ مۇمكىندىگىن قاراستىرۋدا. وسىعان ۇقساس ۇلعايتۋ ماۋسىم، شىلدە جانە تامىز ايلارىنا بۇرىننان ماقۇلدانعان.
تۇپكىلىكتى شەشىم ءالى قابىلدانعان جوق. Reuters دەرەككوزدەرى تالقىلاۋلاردىڭ جالعاسىپ جاتقانىن اتاپ وتەدى؛ وپەك جانە رەسەي بيلىگىنىڭ وكىلدەرى اگەنتتىكتىڭ سۇراۋلارىنا جاۋاپ بەرمەگەن.
سوڭعى ايلاردا اليانس بۇرىن قىسقارتىلعان كولەمدەردى نارىققا بىرتىندەپ قايتارىپ، ءوز ۇلەسىن قالپىنا كەلتىرۋگە ۇمتىلۋدا. الايدا جوسپارلاردى جۇزەگە اسىرۋدى تاياۋ شىعىستاعى جاعداي قيىنداتىپ وتىر. يران توڭىرەگىندەگى اسكەري قاقتىعىس پارسى شىعاناعى ەلدەرىنىڭ مۇناي ەكسپورتىندا ۇزىلىستەرگە اكەلدى، ال قىزىل تەڭىزدەگى حۋسيتتەردىڭ شابۋىلدارى تەڭىز جەتكىزىلىمدەرىنە تاۋەكەلدەردى كۇشەيتتى.
وسى ايادا الەمدىك مۇناي باعاسى اقش پەن يران اراسىنداعى الدىن الا كەلىسىمدەردىڭ ساتسىزدىككە ۇشىراۋىنان كەيىن قايتادان باررەلىنە 100 دوللار بەلگىسىنە جاقىندادى؛ بۇل كەلىسىمدەر بۇرىن ورمۋز بۇعازى ارقىلى جەتكىزىلىمدەردى ۇلعايتۋعا ىقپال ەتكەن بولاتىن.
وپەك مالىمەتىنشە، ماۋسىم ايىندا اليانس ەلدەرى تاۋلىگىنە 36،28 ميلليون باررەل وندىرگەن، ال قاقتىعىس شيەلەنىسكەنگە دەيىن، اقپان ايىندا بۇل كورسەتكىش 43 ميلليون باررەلگە جۋىق بولعان.
Reuters اتاپ وتكەندەي، ەگەر قىركۇيەكتەگى ۇلعايتۋ بەكىتىلسە، وپەك+ 2023 جىلى كەلىسىلگەن ەرىكتى قىسقارتۋلاردى كەرى الۋدى ءىس جۇزىندە اياقتايدى، بۇعان بىرىككەن اراب امىرلىكتەرىنىڭ ۇيىمنان شىعۋى دا ەسكەرىلەدى.