جاساندى ينتەللەكت سالاسىنداعى OpenAI كومپانياسى اۆستراليانىڭ مەملەكەتتىك ۆەدومستۆوسىنا تاعى ءبىر رۇقساتسىز كيبەرشابۋىل جاسالعانىن مالىمدەدى، دەپ حابارلايدى infohub.kz سايتى.
ماۋسىم ايىندا OpenAI اگەنتى جاڭا وڭتۇستىك ۋەلس شتاتىنىڭ مەملەكەتتىك ۆەدومستۆوسىنا رۇقساتسىز كىرىپ، ورمان ورتتەرى تۋرالى بۇرىن جاريالانباعان تاريحي دەرەكتەرگە قول جەتكىزگەن. اقش-تا ورنالاسقان كومپانيا بۇل وقيعانى تەك بەيسەنبىدە عانا جاريا ەتتى. بۇل — Medicare دەرەكتەرىنە قاتىستى فەدەرالدىق ۆەدومستۆوعا جاسالعان ۇقساس شابۋىل تۋرالى حابار تاراعاننان كەيىن بىرنەشە اپتا وتكەن سوڭ بەلگىلى بولعان ەكىنشى وقيعا.
ءقازىر جاڭا وڭتۇستىك ۋەلستىڭ كليمات وزگەرىسى، ەنەرگەتيكا، قورشاعان ورتا جانە سۋ رەسۋرستارى دەپارتامەنتى شتاتتىڭ كيبەرقاۋىپسىزدىك اگەنتتىگىمەن بىرلەسىپ، بۇزۋ فاكتىسىن تەرگەپ جاتىر. اۆستراليا سيگنالدار ديرەكسياسى دا جاڭا وڭتۇستىك ۋەلستىڭ ۇلتتىق پاركتەر جانە جابايى تابيعات قىزمەتىنە جاسالعان شابۋىل تۋرالى حاباردار ەتىلدى.
OpenAI جاڭا وڭتۇستىك ۋەلس ۇكىمەتىنە ءوز اگەنتىنىڭ بەلگىلەنگەن ماقساتتان تىس ارەكەت ەتكەنىن جانە ول العان ستاتيستيكالىق دەرەكتەردىڭ جاريا قولجەتىمدىلىكتە بولماعانىن جەتكىزدى. كومپانيا بۇزۋ فاكتىسىن سەيسەنبىدە ءبىلىپ، اۋقىمىن انىقتاۋ ءۇشىن 48 ساعاتتىق تەكسەرۋ جۇرگىزگەن سوڭ، جاڭا وڭتۇستىك ۋەلس پرەمەرىنىڭ كەڭسەسىنە حابارلاعان.
«ءبىز قاراپ شىققان ناتيجەلەر مودەلدىڭ ەشقانداي جەكە اقپاراتتى العانىن كورسەتپەيدى»، — دەدى OpenAI وكىلى.
سوڭعى وقيعا جاساندى ينتەللەكت كومپانيالارىن قاتاڭىراق رەتتەۋگە جانە كيبەرقاۋىپسىزدىك قورعانىسىن كۇشەيتۋگە شاقىرعانداردىڭ قاتارىن كوبەيتتى.
«ءبىز بۇل كومپانيالارعا سەنىم ارتا المايمىز. ولار ءبىزدىڭ ۇكىمەتتەرىمىزدىڭ ەگەمەندىگىنە، ءومىر سالتىمىزعا قۇرمەت كورسەتپەيدى»، — دەدى جاسىلدار پارتياسىنىڭ دەپۋتاتى ابيگەيل بويد.
بويدتىڭ ايتۋىنشا، بۇزۋ ماۋسىمدا بولعانىمەن، ۇكىمەت تەك وسى اپتادا عانا حاباردار بولعانى الاڭداتارلىق جاعداي.
«ءبىز وسى ترانسۇلتتىق ءىرى تەحنولوگيالىق كومپانيالاردىڭ ءوز ونىمدەرى مەملەكەتتىك جۇيەلەردى بۇزىپ جاتقانىن حابارلاۋ نەمەسە مۇنى بايقاۋعا جەتكىلىكتى كوڭىل ءبولۋ سياقتى قاراپايىم الەۋمەتتىك مىندەتتەمەلەردى ورىندايتىنىنا سەنە المايمىز»، — دەدى بويد.
سارسەنبىدە ىشكى ىستەر دەپارتامەنتى فەدەرالدىق ۆەدومستۆولارعا ەسكىرگەن باعدارلامالىق جاساقتاماسىن تەكسەرىپ، كيبەرقاۋىپسىزدىكتىڭ زاماناۋي تالاپتارعا ساي ەكەنىنە كوز جەتكىزۋدى تاپسىردى.
پرەمەر-مينيستر ماۋسىمدا OpenAI اگەنتىنىڭ اۆستراليا دەنساۋلىق ساقتاۋ جانە ءال-اۋقات ينستيتۋتىن بۇزعانىنا «قاتتى الاڭداۋشىلىق» ءبىلدىردى. ۆيكتوريا شتاتىنىڭ دەنساۋلىق ساقتاۋ دەپارتامەنتى مەن جاڭا وڭتۇستىك ۋەلستىڭ قىلمىس ستاتيستيكاسى جانە زەرتتەۋلەر بيۋروسى دا OpenAI اگەنتىنىڭ ارەكەتىنەن زارداپ شەككەن.
جاساندى ينتەللەكت اگەنتى — باسقا پايدالانۋشى نەمەسە جۇيە اتىنان قولدا بار بارلىق قۇرالداردى پايدالانىپ، ماسەلەلەردى دەربەس شەشەتىن، شەشىم قابىلدايتىن، جوسپار قۇراتىن جانە كۇردەلى مىندەتتەردى ورىندايتىن جۇيە.