OpenAI كومپانياسى ChatGPT چات-بوتىندا ۆيزۋالدى جارنامانىڭ جاڭا فورماتىن سىناقتان وتكىزەتىنىن حابارلادى — جارنامالار سۋرەت گەنەراسياسىنىڭ ناتيجەلەرىنىڭ ءدال جانىندا كورسەتىلەدى، دەپ جازادى infohub.kz سايتى.
TechCrunch باسىلىمىنىڭ مالىمەتىنشە، سىناق قازان ايىنىڭ سوڭىندا اقش-تا باستالىپ، تەگىن Free ءتاريفى مەن ۇنەمدى ChatGPT Go جوسپارىنىڭ پايدالانۋشىلارىن قامتيدى. ال Plus، Pro جانە كورپوراتيۆتىك اككاۋنت يەلەرىنە بۇل جاڭالىق قاتىسپايدى.
كومپانيا وكىلدەرى جارناما بلوكتارى انىق تاڭبالانىپ، گەنەراسيالانعان سۋرەتتەردەن بولەك ورنالاساتىنىن اتاپ ءوتتى. ولاردىڭ ايتۋىنشا، بۇل نەيروجەلىنىڭ جاۋاپتارىنا دا، جاسالعان ارت-كونتەنتتىڭ ساپاسىنا دا اسەر ەتپەيدى. سونىمەن قاتار جارناما دەنساۋلىق نەمەسە ساياسات سياقتى سەزىمتال تاقىرىپتارداعى ديالوگتاردا كورسەتىلمەيدى.
العاشقى كەزەڭگە تۇتىنۋ تاۋارلارى مەن قىزمەتتەرىن ۇسىناتىن جارناما بەرۋشىلەردىڭ شەكتەۋلى توبى تارتىلدى.
اشىقتىق پەن قاۋىپسىزدىكتى قامتاماسىز ەتۋ ءۇشىن OpenAI DoubleVerify مەن Integral Ad Science سياقتى سىرتقى سەرىكتەستەردى، سونداي-اق Triple Whale جانە WorkMagic اناليتيكا سەرۆيستەرىن تارتىپ وتىر.
بۇل قادام كومپانيانىڭ اپتاسىنا 1،2 ميلليارد پايدالانۋشىنى قۇرايتىن سەرۆيس اۋديتورياسىن مونەتيزاسيالاۋعا جانە ەسەپتەۋ قۋاتىنىڭ جوعارى قۇنىن وتەۋگە ۇمتىلىسىن كورسەتەدى.