ورالدا ەرەكشە ءىرى مولشەردەگى الاياقتىق تۋرالى قىلمىستىق ءىس بويىنشا ۇكىم جاريالاندى: كاسىپورىن شوتىنان 2،2 ملن اقش دوللارىن جىمقىرۋدى ۇيىمداستىرعان سوتتالۋشى 10 جىلعا باس بوستاندىعىنان ايىرىلدى، دەپ حابارلايدى infohub.kz سايتى.
باتىس قازاقستان وبلىستىق سوتىنىڭ ءباسپاسوز قىزمەتى ءمالىم ەتكەندەي، ورال قالالىق سوتى قازاقستان رەسپۋبليكاسى قىلمىستىق كودەكسىنىڭ 190-بابى 4-بولىگىنىڭ 2-تارماعى بويىنشا ايىپتالعان ادامعا قاتىستى ءىستى قارادى — ەرەكشە ءىرى مولشەردەگى الاياقتىق.
سوت انىقتاعانداي، سوتتالۋشى اقساي قالاسىندا جاۋاپكەرشىلىگى شەكتەۋلى سەرىكتەستىك تىركەپ، وندا جالعىز قۇرىلتايشى ءارى باسشى بولعان. كەيىن ول جارعىلىق كاپيتالداعى ۇلەستەردى قىزمەتكەرلەر اراسىندا قايتا بولگەن، الايدا ءىس جۇزىندە سەرىكتەستىك قىزمەتىن باقىلاۋدى جالعاستىرىپ، بيزنەس-مەنەدجەر لاۋازىمىن اتقارعان.
اقش اۋماعىندا ءجۇرىپ، سوتتالۋشى كاسىپورىننىڭ اقشالاي قاراجاتىن جىمقىرۋدىڭ قىلمىستىق جوسپارىن ازىرلەگەن. سەرىكتەستىكتىڭ جاڭا ديرەكتورىن اداستىرىپ، وعان باسقا سەرىكتەستىكپەن كەلىسىمشارتتى ۇزارتۋ ءۇشىن جابدىق ساتىپ الۋ قاجەتتىگى تۋرالى كورىنەۋ جالعان مالىمەتتەر ايتقان.
قازاقستان رەسپۋبليكاسىنىڭ ۆاليۋتالىق باقىلاۋ تالاپتارىن اينالىپ ءوتۋ ءۇشىن سوتتالۋشى باسشىنى مامىلەلەردى پايىزسىز قارىز تۇرىندە راسىمدەۋگە كوندىرگەن.
ناتيجەسىندە سەرىكتەستىك شوتىنان سوتتالۋشى باقىلايتىن امەريكاندىق كومپانيانىڭ شوتىنا بىرنەشە ترانشپەن جالپى سوماسى 2،2 ملن اقش دوللارى، ياعني 948 ملن 337 مىڭ تەڭگەگە بالامالى قاراجات اۋدارىلعان.
سوت ەر ادامدى قازاقستان رەسپۋبليكاسى قىلمىستىق كودەكسىنىڭ 190-بابى 4-بولىگىنىڭ 2-تارماعىندا كوزدەلگەن ەرەكشە ءىرى مولشەردەگى الاياقتىق جاساعانى ءۇشىن كىنالى دەپ تانىپ، وعان 8 جىلعا باس بوستاندىعىنان ايىرۋ جازاسىن تاعايىندادى.
قازاقستان رەسپۋبليكاسى قىلمىستىق كودەكسىنىڭ 58-بابىنىڭ 5 جانە 6-بولىكتەرىنە سايكەس، نەعۇرلىم جەڭىل جازانى نەعۇرلىم اۋىر جازامەن ءسىڭىرۋ جولىمەن، اتىراۋ قالاسىنىڭ №2 سوتىنىڭ 2025 جىلعى 24 شىلدەدەگى ۇكىمىمەن تاعايىندالعان جازانى قوسا ەسەپتەگەندە، سوتتالۋشىعا تۇپكىلىكتى 10 جىلعا باس بوستاندىعىنان ايىرۋ جازاسى تاعايىندالىپ، ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە وتەۋ بەلگىلەندى.
سونىمەن قاتار ول كوممەرسيالىق كاسىپورىنداردا باسشىلىق لاۋازىمداردى اتقارۋ قۇقىعىنان 3 جىلعا ايىرىلىپ، قىلمىستىق جولمەن تابىلعان م ۇلىك تاركىلەندى.
جابىرلەنۋشى تاراپتىڭ ازاماتتىق تالاپ-ارىزى تولىق كولەمدە قاناعاتتاندىرىلدى. سوتتالعان ادامنان سەرىكتەستىك پايداسىنا 2،2 ملن اقش دوللارى (948 ملن 337 مىڭ تەڭگە) مولشەرىندەگى م ۇلىكتىك زالال، سونداي-اق مەملەكەتتىك باج ءوندىرىلدى.
ازاماتتىق تالاپ-ارىزدى قامتاماسىز ەتۋ ماقساتىندا سوتتالعان ادامنىڭ جانە وعان باقىلاۋداعى شەتەلدىك كومپانيانىڭ بانكتىك شوتتارىنا سالىنعان تىيىم ساقتالدى.
ۇكىم زاڭدى كۇشىنە ەنگەن جوق جانە اپەللياسيالىق تارتىپپەن شاعىمدانۋعا بولادى.