ورالدا اپەللياسيالىق ساتىداعى سوت تالاپكەردىڭ ورىس ءتىلىن بىلمەيتىنى تۋرالى جالعان مالىمدەمەدەن كەيىن ءىس جۇرگىزۋ قۇقىقتارىن تەرىس پايدالانعانى ءۇشىن اقشالاي ءوندىرىپ الۋ شاراسىن قولداندى، دەپ حابارلايدى infohub.kz سايتى.
باتىس قازاقستان وبلىستىق سوتىنىڭ ءباسپاسوز قىزمەتىنىڭ حابارلاۋىنشا، اكىمشىلىك ىستەر جونىندەگى سوت القاسى ءىستى قاراۋ بارىسىندا تالاپكەردىڭ وكىلىنە ءىس جۇرگىزۋ قۇقىقتارىن تەرىس پايدالانعانى ءۇشىن ق ر اكىمشىلىك راسىمدىك-پروسەستىك كودەكسىنىڭ 127-بابىندا كوزدەلگەن ءىس جۇرگىزۋ ماجبۇرلەۋ شاراسى – اقشالاي ءوندىرىپ الۋدى قولداندى.
سوت وتىرىسىندا تالاپكەردىڭ جوقتىعىنىڭ سەبەبىن انىقتاۋ كەزىندە ونىڭ وكىلى سەنىم ءبىلدىرۋشىنىڭ سوت ءىسىن جۇرگىزۋ ءتىلى – ورىس ءتىلىن مەڭگەرمەگەندىكتەن ءىستى قاراۋعا قاتىسپايتىنىن مالىمدەدى. سونىمەن قاتار اكىمشىلىك تالاپ قويۋ تەك داۋلانىپ وتىرعان اكىمشىلىك اكت ورىس تىلىندە شىعارىلعاندىقتان، سول تىلدە جازىلعانى كورسەتىلدى. بۇل مالىمەتتەردىڭ ماڭىزى زور بولدى، سەبەبى ولار ءبىرىنشى ساتىداعى سوتتىڭ سوت ءىسىن جۇرگىزۋ ءتىلى تۋرالى زاڭ تالاپتارىن بۇزعانىن جانە قابىلدانعان سوت اكتىسىنىڭ زاڭدىلىعىنا اسەر ەتۋى مۇمكىن ەدى.
تالاپكەر وكىلىنىڭ دالەلدەرىن تەكسەرۋ ناتيجەسىندە ءبىرىنشى ساتىداعى سوتتا تالاپكەردىڭ ءتوراعالىق ەتۋشى سۋديانىڭ سۇراقتارىن ەركىن ءتۇسىنىپ، ورىس تىلىندە جاۋاپ بەرگەنى، قارىم-قاتىناستا قينالماعانى جانە سوت ءىسىن جۇرگىزۋ ءتىلىن اۋىستىرۋ نە اۋدارماشى شاقىرۋ تۋرالى ءوتىنىشحات بەرمەگەنى انىقتالدى.
سوت القاسى وتىرىستى جالعاستىرىپ، بەينەكونفەرەنسبايلانىس ارقىلى تالاپكەردى قوستى. وتىرىس بارىسىندا ول دا ورىس تىلىندە ەركىن سويلەپ، اۋدارماشىسىز سوتتىڭ سۇراقتارىنا جاۋاپ بەردى.
سوت القاسى تالاپكەر وكىلىنىڭ سوتقا جالعان مالىمەت بەرگەنى، سونىڭ سالدارىنان سوت اپەللياسيالىق شاعىمنىڭ دالەلدەرىن قاراۋعا قاتىسى جوق قوسىمشا ءىس جۇرگىزۋ ارەكەتتەرىن جاساۋعا ءماجبۇر بولىپ، سوت تالقىلاۋىنىڭ سوزىلۋىنا اكەپ سوقتىرعانى دەگەن قورىتىندىعا كەلدى.
ارپك-نىڭ 28-بابى 2-بولىگىنە سايكەس، اكىمشىلىك پروسەستە تالاپكەر سوتقا ءىستىڭ ناقتى ءمان-جايلارىن حابارلاۋعا جانە تولىق شىنايى ايتۋعا مىندەتتى. بۇل مىندەت تالاپكەردىڭ وكىلىنە دە قاتىستى، ول وزىنە بەرىلگەن ءىس جۇرگىزۋ قۇقىقتارىن ادال پايدالانۋعا ءتيىس.
انىقتالعان ءمان-جايلاردى ەسكەرە وتىرىپ، سوت القاسى وكىلدىڭ ىس-ارەكەتىن ءىس جۇرگىزۋ قۇقىقتارىن تەرىس پايدالانۋ دەپ تانىپ، 10 اەك (43 250 تەڭگە) مولشەرىندە اقشالاي ءوندىرىپ الۋ شاراسىن قولداندى.
«اقشالاي ءوندىرىپ الۋدى قولدانۋ پروسەسكە قاتىسۋشىلاردىڭ ادال مىنەز-قۇلقىن قامتاماسىز ەتۋگە، ءىس جۇرگىزۋ قۇقىقتارىن تەرىس پايدالانۋدىڭ الدىن الۋعا، سوت ءىسىن جۇرگىزۋدىڭ ورىندى مەرزىمدەرىن ساقتاۋعا جانە سوت پەن زاڭعا قۇرمەتتى كوزقاراستى نىعايتۋعا باعىتتالعان»، — دەپ اتاپ ءوتتى باتىس قازاقستان وبلىستىق سوتىنىڭ ءباسپاسوز قىزمەتى.
سوتتىڭ قاۋلىسى زاڭدى كۇشىنە ەندى.