ورالدا ءداستۇرلى «تەنتەك كادە» توي ءراسىمى توبەلەسكە ۇلاسىپ، قوناقتاردىڭ ءبىرى اۋرۋحاناعا جەتكىزىلدى، دەپ حابارلايدى infohub.kz سايتى.
«موي گورود» باسىلىمىنىڭ مالىمەتىنشە، ورالداعى تويلاردىڭ بىرىندە قوناقتار «تەنتەك كادە» ءداستۇرىن وتكىزگەن. بۇل ءراسىم ءازىل-قالجىڭ، كوڭىلدى تاپسىرمالار مەن سيمۆولدىق تولەم ارقىلى مەرەكەنى قىزىقتى ەتىپ، ەكى جاقتى جاقىنداستىرۋدى كوزدەيدى.
الايدا كۇيەۋ جاعىنىڭ ءبىر وكىلى ءازىلدى جۇرەككە جاقىن قابىلداعان. ەكىنشى قاتىسۋشى ويىندى جالعاستىرعاندا، ەر ادام شىداي الماي، وعان جۇدىرىقپەن ۇمتىلعان.
ناتيجەسىندە زارداپ شەككەن ادام شۇعىل تۇردە اۋرۋحاناعا جەتكىزىلدى. الدىن الا دەرەكتەر بويىنشا، ونىڭ قابىرعاسى سىنعان جانە بىرنەشە ءتىسى ج ۇلىنعان. ءقازىر جانجالدىڭ ناقتى ءمان-جايى مەن دەنساۋلىققا كەلتىرىلگەن زياننىڭ اۋىرلىعى انىقتالىپ جاتىر.
باتىس قازاقستان وبلىسى پوليسيا دەپارتامەنتىنىڭ ءباسپاسوز قىزمەتى باسىلىمعا بۇل فاكتى بويىنشا قۇقىق قورعاۋ ورگاندارىنا ەشقانداي ءوتىنىش پەن شاعىم تۇسپەگەنىن حابارلادى. سونىمەن قاتار، جانجالعا قاتىسۋشىلاردىڭ جەكە باسى انىقتالعان، ءقازىر تەكسەرۋ جۇرگىزىلۋدە.
«ازاماتتاردىڭ وزدەرىنىڭ تۇسىندىرمەلەرىنە سايكەس، بولعان جاعداي قويىلىمدىق سيپاتتا بولعان جانە ينسەنيروۆكا ەدى»، — دەپ اتاپ ءوتتى ءتارتىپ ساقشىلارى.