ورالدا كوپبەيىندى وبلىستىق بالالار اۋرۋحاناسىنىڭ دارىگەرلەرى بالاعا وتا جاسادى. ونىڭ اسقازانىنان شاشتىڭ ۇلكەن شوعىرى تابىلدى. تريحوبەزوار دەپ اتالاتىن بوگدە ءتۇزىلىمنىڭ سالماعى شامامەن ءبىر كەلىگە جەتتى، دەپ حابارلايدى infohub.kz سايتى.
ايتۋلارىنشا، شاش شوعىرىن دارىگەرلەر تەكسەرۋ بارىسىندا انىقتاعان. ءتۇزىلىمنىڭ مولشەرى مەن تىعىزدىعىنا بايلانىستى ماماندار تولىق حيرۋرگيالىق ارالاسۋعا ءماجبۇر بولدى — ونى ەندوسكوپيالىق جولمەن الۋ مۇمكىن بولمادى.
تريحوبەزوار — ءوزىنىڭ نەمەسە بوتەن ادامنىڭ شاشىن ۇنەمى جۇتۋ ادەتىنەن (تريحوفاگيا) اسقازاندا پايدا بولاتىن تىعىز شاش شوعىرى. بۇل پاتولوگيا كوبىنەسە بالالار مەن جاسوسپىرىمدەردە كەزدەسەدى.
اتا-انالارعا ءبىرقاتار الاڭداتارلىق بەلگىلەرگە نازار اۋدارۋعا كەڭەس بەرىلەدى: ءىشتىڭ جوعارعى بولىگىندەگى اۋىرسىنۋ مەن اۋىرلىق، جۇرەك اينۋ جانە قۇسۋ، تابەتتىڭ تومەندەۋى، تاماق جەگەندە تەز تويۋ جانە سالماق جوعالتۋ. سونداي-اق اۋىزدان جاعىمسىز ءيىستىڭ شىعۋى جانە ءىش ايماعىندا سيپاپ سەزىلەتىن تىعىزدالۋ دا الاڭداتۋى ءتيىس.
«شاش شوعىرى سونشالىقتى ءوسىپ، اسقازاننان ون ەكى ەلى ىشەككە جانە اششى ىشەككە وتە باستاعاندا، بۇل جاعدايدى "راپۋنسەل سيندرومى" دەپ اتايدى. ول ىشەك تۇيىقتالۋى، ىشكى قان كەتۋ، ءتىپتى اسقازان قابىرعاسىنىڭ جارىلۋى سياقتى اسقىنۋلارىمەن ولىمگە اكەلۋى مۇمكىن»، — دەيدى دارىگەرلەر.
پاتولوگيا فيبروگاسترودۋودەنوسكوپيا (فگدس)، سونداي-اق ۋلترادىبىستىق زەرتتەۋ جانە كومپيۋتەرلىك توموگرافيا ارقىلى انىقتالادى. شاشتىڭ شاعىن شوعىرىن كەيدە ەندوسكوپيالىق جولمەن الۋعا بولادى، ال اسقىنعان جاعدايدا تەك حيرۋرگيالىق وتا كومەكتەسەدى.
حيرۋرگيالىق ەمنەن كەيىن ناۋقاستارعا مىندەتتى تۇردە بالالار پسيحولوگىنىڭ نەمەسە پسيحياتردىڭ كومەگى قاجەت، ويتكەنى شاش جەۋ ادەتى ەموسيونالدىق بۇزىلىستارمەن جانە مىنەز-ق ۇلىق بۇزىلىستارىمەن بايلانىستى.