ورالداعى №2 سوت كىر جۋعىش ماشينادان شىققان ورتكە قاتىستى ەرەكشە ازاماتتىق ءىستى قارادى. وقيعا سالدارىنان تەحنيكا دۇكەنى زارداپ شەككەندەرگە 13 ميلليون تەڭگەدەن استام تولەۋگە مىندەتتەلدى، دەپ حابارلايدى infohub.kz سايتى.
باتىس قازاقستان وبلىسى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ مالىمەتىنشە، ەكى ايەل تۇرمىستىق تەحنيكا دۇكەنىنە تالاپ قويعان. ءىس قۇجاتتارىنا سايكەس، 2025 جىلعى 17 تامىزدا ولاردىڭ ءبىرى وسى دۇكەننەن كەپتىرگىش فۋنكسياسى بار كىر جۋعىش ماشينانى 174 990 تەڭگەگە ساتىپ العان. تەحنيكانى كۇردەلى جوندەۋدەن وتكەن جاڭا ءۇيدىڭ پاتەرىندەگى اسۇيگە ورناتقان. بۇل پاتەردە ەكىنشى تالاپكەر وتباسىمەن تۇرعان.
سول جىلدىڭ 11 قىركۇيەگىندە پاتەردە ءورت شىقتى. ورت-تەحنيكالىق ساراپتاما ءورتتىڭ كىر جۋعىش ماشينانىڭ كورپۋسى ىشىندە پايدا بولعانىن انىقتادى. سەبەبى — اۆاريالىق رەجيمدەگى جۇمىس سالدارىنان سىمداردىڭ وقشاۋلاعىشى مەن ەلەكتروندىق بلوكتىڭ پوليمەرلىك ەلەمەنتتەرىنىڭ تۇتانۋى.
وت پاتەردىڭ وزىنە دە، ونداعى م ۇلىككە دە زاقىم كەلتىردى. قازاقستان رەسپۋبليكاسى ادىلەت مينيسترلىگىنىڭ سوت ساراپتامالارى ورتالىعىنىڭ قورىتىندىسى بويىنشا، قالپىنا كەلتىرۋ جوندەۋىنىڭ قۇنى 7 857 676 تەڭگەنى قۇرادى. سونىمەن قاتار، وتباسى بىرنەشە اي بويى باسپانا جالداۋعا ءماجبۇر بولدى، بۇل دا تالاپتىڭ نەگىزىنە ەندى. تالاپكەرلەر مورالدىق زياندى وتەۋدى دە تالاپ ەتتى.
جاۋاپكەر شىعىندى ءوز ەركىمەن وتەۋدەن باس تارتقاندىقتان، ءىس سوتقا جىبەرىلدى. 2026 جىلعى 4 تامىزدا ورال قالاسىنىڭ №2 سوتى تالاپتى ءىشىنارا قاناعاتتاندىرۋ تۋرالى شەشىم شىعاردى. دۇكەننەن وندىرىلەتىن سومالار: قالپىنا كەلتىرۋ جوندەۋىنىڭ قۇنى — 7 857 676 تەڭگە، ماتەريالدىق شىعىندار — 4 090 000 تەڭگە، مورالدىق زياننىڭ وتەماقىسى — 500 000 تەڭگە، مەملەكەتتىك باج — 87 580 تەڭگە، سونداي-اق ساراپتاما جۇرگىزۋ شىعىندارى — 315 360 جانە 150 000 تەڭگە. تولەمدەردىڭ جالپى سوماسى 13 ميلليون تەڭگەدەن استى.
سوت شەشىمى ازىرگە زاڭدى كۇشىنە ەنگەن جوق، جاۋاپكەر ونى بەلگىلەنگەن تارتىپپەن شاعىمداۋعا قۇقىلى.