ورالدا ۇلى وتان سوعىسىنىڭ ارداگەرى، 1945 جىلعى جەڭىس شەرۋىنە قاتىسقان، «حالىق قاھارمانى» اتاعىن العان يۆان ستەپانوۆيچ گاپيچ 103 جاسىندا ومىردەن ءوتتى، دەپ حابارلايدى infohub.kz.
يۆان گاپيچ 1941 جىلى مايدانعا ءوز ەركىمەن اتتانىپ، بۇكىل سوعىستى بايلانىسشى بولىپ وتكەن. ول ۋكراينانى، بەلارۋستى، پولشانى جانە چەحوسلوۆاكيانى ازات ەتۋگە قاتىسىپ، كەنيگسبەرگكە دەيىن جەتكەن. كورسەتكەن ەرلىگى مەن قاھارماندىعى ءۇشىن ءىىى دارەجەلى داڭق وردەنى، ءىى دارەجەلى وتان سوعىسى وردەنى، قىزىل جۇلدىز وردەنى جانە باسقا دا مەملەكەتتىك ناگرادالارمەن ماراپاتتالعان.
ونىڭ ءومىربايانىندا ەرەكشە ورىن الاتىنى — 1945 جىلى 24 ماۋسىمدا قىزىل الاڭدا وتكەن تاريحي جەڭىس شەرۋىنە قاتىسۋى. 2023 جىلى يۆان ستەپانوۆيچكە قازاقستان رەسپۋبليكاسىنىڭ ەڭ جوعارى اتاعى — «حالىق قاھارمانى» بەرىلدى.
ورالداعى ورىس ۇيىندە يۆان ستەپانوۆيچ قىزمەتكەرلەر ءۇشىن تەك اڭىزعا اينالعان ارداگەر عانا ەمەس، سونىمەن بىرگە كوپ جىلدار بويى جىلى قارىم-قاتىناستا بولعان ادام ەكەنىن اتاپ ءوتتى.
«ونى مەرەكەلەرمەن جانە جەڭىس كۇنىمەن قۇتتىقتاۋ، قوناققا بارۋ، ونىڭ ەستەلىكتەرىن تىڭداۋ، ونىڭ وشپەس ومىرلىك كۇشىن، دانالىعى مەن ىزگى نيەتىن كورۋ ءبىز ءۇشىن ۇلكەن مارتەبە ەدى»، — دەلىنگەن حابارلامادا.
ۇيىم يۆان ستەپانوۆيچتىڭ تۋعان-تۋىستارى مەن جاقىندارىنا قايعىرا كوڭىل ايتىپ، ول تۋرالى جارقىن ەستەلىك ونى بىلەتىندەردىڭ جۇرەگىندە ماڭگى ساقتالاتىنىن اتاپ ءوتتى.