شىمكەنتتىك «ورداباسى» «جەتىسۋ»مەن قوناقتا ءىرى جەڭىسكە جەتىپ، قازاقستان فۋتبول چەمپيوناتىنداعى كوشباسشىلىعىن نىعايتتى. ماچ 4:0 ەسەبىمەن اياقتالدى، دەپ حابارلايدى infohub.kz سايتى.
تالدىقورعانداعى ويىندا استانوۆ باۋىرلارى ەرەكشە كوزگە ءتۇستى: 18-مينۋتتا كىشىسى ەلحان، ال 78-مينۋتتا ۇلكەنى سۇلتانبەك گول سوقتى. ولاردىڭ گولدارىنىڭ اراسىندا، ۇزىلىستەن كەيىن بىردەن برازيليالىق لەو ناتەل، ال 80-مينۋتتا وتانداسى ەۆەرتون ماسەدو نۇكتە قويدى.
نورۆەگيالىق شابۋىلشى بەرن يونسەن بۇعان دەيىن قاتارىنان التى ماچتا قارسىلاستار قاقپاسىن دالدەگەن ەدى، ەندى ەكىنشى رەت قاتارىنان گولسىز الاڭنان كەتتى. دەگەنمەن، «قايراتتان» ءتورت ۇپايعا وزىپ تۇرعان اندرەي مارتين كومانداسىندا سكانديناۆيالىقسىز دا گول سوعاتىن ويىنشىلار جەتكىلىكتى.
تۋردىڭ تاعى ءبىر ماچىندا اۋتسايدەر «التاي» ءوز الاڭىندا « قىزىلجاردى» جەڭە جازدادى. فارەرلىك يوحاننەس ءبورتاليدتىڭ گولىنان كەيىن ەسەپتە ۇتىلىپ تۇرىپ، يەلەرى يبراگيم دادايەۆ پەن نيكولا دجامبوردىڭ ءدال سوققىلارىمەن ەسەپتى تەڭەستىرىپ قانا قويماي، العا شىقتى. تەك قوسىمشا ۋاقىتتا يۆۋارلىق ەتەن بەگرە قوناقتارعا تەڭدىك اكەلدى — 2:2.
جەكسەنبىدە 21-تۋر «استانا» — «وقجەتپەس»، «اتىراۋ» — «اقتوبە» جانە «ەلىماي» — «ەرتىس» ماچتارىمەن جالعاسادى. «قايرات» — «جەڭىس» جانە «توبىل» — «قايسار» كەزدەسۋلەرى كلۋبتاردىڭ ەۋروكۋبوكتەرگە قاتىسۋىنا بايلانىستى كەيىنگە شەگەرىلدى، جاڭا كۇندەرى كەيىنىرەك بەلگىلەنەدى.