اقش-تىڭ ورەگون شتاتىنداعى اۋىلدىق جەردە بەس ادامدى ءولتىردى دەگەن كۇدىككە ىلىنگەن ەر ادام وز-وزىنە قول جۇمساعان كۇيىندە تابىلدى. بۇل تۋرالى جەرگىلىكتى قۇقىق قورعاۋ ورگاندارى جەكسەنبى كۇنى حابارلادى. وقيعا پورتلەندتەن شامامەن 48 شاقىرىم جەردەگى فورەست-گروۋۆ ماڭىنداعى اۋىلدىق قاۋىمداستىقتا بولعان. پوليسياعا كولىك ءورتى تۋرالى حابارلاما تۇسكەننەن كەيىن، سەنبى كۇنى ۇيدەن بەس ادامنىڭ دەنەسى تابىلعان. سونىمەن قاتار، ۇيدە بىرنەشە ءۇي جانۋارلارىنىڭ دا ءولى دەنەلەرى انىقتالعان.
ۆاشينگتون وكرۋگىنىڭ شەريف كەڭسەسى 36 جاستاعى بەندجامين چارلز پاركەردى كۇدىكتى دەپ اتادى. ول سيەتلدەن شامامەن 72 شاقىرىم جەردەگى ۆاشينگتون شتاتىنىڭ ەنۋمكلو قالاسىندا ءوز كولىگىندە ءولى كۇيىندە تابىلعان. ول وز-وزىنە قول جۇمساعان دەپ بولجانۋدا. ۆاشينگتون وكرۋگىنىڭ شەريفى كەپريس مەسسي: «وسى جەردەگى 22 جىلدىق تاجىريبەمدە مۇنداي كۇردەلى وقيعانىڭ كۋاسى بولعان ەمەسپىن»، — دەدى.
تەرگەۋشىلەر بۇل قىلمىستىڭ كەزدەيسوق زورلىق-زومبىلىق ەمەس ەكەنىن ايتتى، ءبىراق ەگجەي-تەگجەيىن اشپادى. قۇربانداردىڭ جاسى مەن جىنىسى، ءولىم سەبەپتەرى جانە ولاردىڭ اراسىنداعى بايلانىس تۋرالى دەرەۋ جاريالانبادى. شەريف كەڭسەسىنىڭ تەرگەۋشىسى شەننون ۋايلد جەكسەنبى كۇنگى ءباسپاسوز ءماسليحاتىندا قۇربانداردىڭ كىم ەكەنىن انىقتاۋ ءالى جالعاسىپ جاتقانىن ايتتى. «ءبىر ادامنىڭ قازاسى — لوگيستيكالىق قيىندىق، ال بەسەۋى — ودان دا كۇردەلى»، — دەدى ۋايلد.
جۋرناليستەردىڭ ولىكتەر تابىلعاننان كەيىن اقپاراتتىڭ كەش جاريالانۋىنا قاتىستى سۇراعىنا ۋايلد، الدىمەن قۇربانداردىڭ جەكە باسىن انىقتاپ، تۋىستارىنا حابارلاۋ قاجەت بولعانىن، سودان كەيىن عانا ءباسپاسوز ءماسليحاتىن وتكىزگەندەرىن ءتۇسىندىردى. ول سونداي-اق تەرگەۋدىڭ «وتە بەلسەندى جانە كوپ قىرلى» ەكەنىن، اقپاراتتىڭ دالدىگىن قامتاماسىز ەتۋ ماڭىزدى ەكەنىن اتاپ ءوتتى.
قارۋلى زورلىق-زومبىلىق مۇراعاتىنىڭ (Gun Violence Archive) دەرەكتەرىنە سايكەس، بيىل اقش-تا كەمىندە 16 جاپپاي كىسى ءولتىرۋ وقيعاسى تىركەلگەن. بۇل ۇيىم ءتورت نەمەسە ودان دا كوپ ادامنىڭ ولىمىمەن اياقتالعان وقيعالاردى جاپپاي كىسى ءولتىرۋ دەپ سانايدى. بۇل وقيعا 7 تامىزدان بەرى اقش-تاعى ءتورتىنشى جاپپاي كىسى ءولتىرۋ بولدى.