قازاقستاننىڭ بىرنەشە وڭىرىندە ورمان ورتتەرى تۇتانىپ جاتىر. ەكولوگيا جانە تابيعي رەسۋرستار مينيسترلىگى مەن توتەنشە جاعدايلار مينيسترلىگى (تجم) اۋەدەن تۇسىرىلگەن فوتو جانە ۆيدەولاردى جاريالاپ، اپاتتىڭ اۋقىمىن كورسەتتى، دەپ حابارلايدى infohub.kz.
ەكولوگيا مينيسترلىگىنىڭ مالىمەتىنشە، 16 شىلدەدە ءورتتى سوندىرۋگە 600-گە جۋىق ادام، 148 بىرلىك جەرۇستى تەحنيكاسى جانە 7 تىكۇشاق جۇمىلدىرىلدى. اۋەدەن 123 رەت سۋ توگىلىپ، وشاقتارعا 157 توننا سۋ جەتكىزىلدى. وقيعا ورنىنا ەكولوگيا ءمينيسترى ەرلان نىسانبايەۆ پەن توتەنشە جاعدايلار ءمينيسترى شىڭعىس ءارىنوۆ بارىپ، كۇشتەر مەن قۇرالداردىڭ ءىس-قيمىلىن ۇيلەستىرۋدە.
مەملەكەتتىك ورمان قورى اۋماعىندا بارلىعى 10 ورمان ءورتى تىركەلدى: ونىڭ 4ء-ى «سەمەي ورمانى» مەملەكەتتىك ورمان تابيعي رەزەرۆاتىندا، 6-ى «ەرتىس ورمانى» رەزەرۆاتىندا. «ەرتىس ورمانىنداعى» ورتتەردىڭ كوپشىلىگى نايزاعاي رازريادتارىنان پايدا بولعان. ءقازىر اۋماقتاردى تەكسەرۋ، ورتتەردى وقشاۋلاۋ جانە تولىق جويۋ جۇمىستارى جۇرگىزىلۋدە.
ەكولوگيا مينيسترلىگىندە انومالدى ىستىق جانە قۇرعاق اۋا رايىنا بايلانىستى ءورت ءقاۋپى دەڭگەيى وتە جوعارى ەكەنىن، بارلىق قىزمەتتەر كۇشەيتىلگەن جۇمىس رەجيمىنە كوشىرىلگەنىن اتاپ ءوتتى. جاعداي تۇراقتى باقىلاۋدا.
تجم ورتتەردى جەرۇستى كۇشتەرى مەن اۆياسيانى تارتا وتىرىپ جويۋ جالعاسىپ جاتقانىن، ەلدى مەكەندەردى قورعاۋ ءۇشىن بارلىق قاجەتتى شارالار قابىلدانىپ جاتقانىن حابارلادى. مينيستر شىڭعىس ءارىنوۆ، مينيستر ەرلان نىسانبايەۆ جانە اباي وبلىسىنىڭ اكىمى بەرىك ءۋالي «سەمەي ورمانىنداعى» ەڭ كۇردەلى ءورت وشاقتارىن ارالاپ شىعىپ، جەدەل شتاب قۇرىلدى. ءورتتى وقشاۋلاۋ تۇنگى ۋاقىتتا دا جالعاسۋدا.
قاراڭعى تۇسكەن سوڭ سۋ قۇيۋ قۇرىلعىلارىمەن اۆياسيالىق جۇمىستار ۋاقىتشا توقتاتىلدى. ءورت ورنىندا جاڭبىر جاۋىپ، تۇنگى جاۋىن-شاشىن كۇتىلۋدە.
بۇعان دەيىن ورمان ءورتى سالدارىنان «DosbolLike» لاگەرىنەن 190 بالا جانە 20 قىزمەتكەر ەۆاكۋاسيالانعان ەدى. پرەمەر-مينيستر ولجاس بەكتەنوۆ توتەنشە جاعداي ورنىنا مينيسترلەردى شۇعىل جىبەردى.