وتكەن تاۋلىكتە قازاقستاننىڭ مەملەكەتتىك ورمان قورى اۋماعىندا 13 ءورت تىركەلدى. ءتىلسىز جاۋدىڭ كوپشىلىگىن اۋە پاترۋلدەۋ جانە ەرتە انىقتاۋ جۇيەسىنىڭ ارقاسىندا تاپتى، دەپ حابارلايدى infohub.kz.
شىعىس قازاقستان وبلىسىندا ەكى ءورت بولدى. قاراعاندى وبلىسىندا، «مارقاكول» جانە «قورعالجىن» مەملەكەتتىك تابيعي قورىقتارىندا، «باياناۋىل» ۇلتتىق پاركىندە، سونداي-اق «جاسىل ايماق» رمك اۋماعىندا بىر-بىردەن ءورت تىركەلدى.
«قارقارالى» ۇلتتىق پاركىندە جانە «ەرتىس ورمانى» مەن «سەمەي ورمانى» مەملەكەتتىك ورمان تابيعي رەزەرۆاتتارىندا تاعى ەكى-ەكىدەن ءورت تىركەلدى.
حابارلامالار تۇسكەننەن كەيىن ءورت ورىندارىنا ورمان مەكەمەلەرىنىڭ قىزمەتكەرلەرى جىبەرىلدى. سوندىرۋگە «قازاۆياورمانقورعاۋ» تىكۇشاعى مي-8 سۋ قۇياتىن قۇرىلعىمەن، اۆياسيالىق ءورت ءسوندىرۋ قىزمەتى جانە مەملەكەتتىك ورمان قورعاۋ بولىمشەلەرى جۇمىلدىرىلدى.
كەيبىر ايماقتاردا قالعان ءورت وشاقتارىن جويۋ جالعاسۋدا.
ىستىق پەن نايزاعايلى مايدانداردىڭ وتۋىنە بايلانىستى قازاقستاندا ءورت ءقاۋپىنىڭ جوعارى دەڭگەيى ساقتالۋدا. مەملەكەتتىك ورمان قورعاۋ جانە «قازاۆياورمانقورعاۋ» ورمان قورىن اۋە جانە جەر ءۇستى پاترۋلدەۋدى كۇشەيتىلگەن رەجيمدە جالعاستىرۋدا.
الدىڭعى كۇنى تەك اقمولا وبلىسىندا عانا تاۋلىك ىشىندە جالپى اۋدانى 230 گەكتاردان اساتىن قۇرعاق وسىمدىكتەردىڭ توعىز ءورت وشاعى جويىلدى. ورتتەر اتباسار، اقكول، سەلينوگراد، جاقسى جانە قورعالجىن اۋداندارىندا بولدى. سوندىرۋگە تجد بولىمشەلەرى، «قازاۆياقۇتقارۋ»، جەرگىلىكتى اتقارۋشى ورگاندار، ورمان مەكەمەلەرى جانە باسقا دا قىزمەتتەر تارتىلدى.