اقش پەن يران اراسىنداعى قاقتىعىس دۋباي بيلىگىن ورمۋز بۇعازىن اينالىپ وتەتىن بالاما جول ىزدەۋگە ءماجبۇر ەتتى. پورت وپەراتورى DP World بىرىككەن اراب امىرلىكتەرىنىڭ شىعىس جاعالاۋىندا جاڭا پورت سالۋدى جوسپارلاپ وتىر. بۇل كەمەلەرگە ومان شىعاناعىنان تىكەلەي ەلگە كىرۋگە مۇمكىندىك بەرەدى، دەپ حابارلايدى infohub.kz.
Financial Times دەرەگىنشە، دۋبايدىڭ باستى پورتى جەبەل-اليدىڭ بەلسەندىلىگى ورمۋز بۇعازى ارقىلى كەمە قاتىناسىنداعى قيىندىقتار سالدارىنان 90–95% تومەندەگەن. ەندى DP World ءباا-نىڭ شىعىس جاعالاۋىندا، اتاپ ايتقاندا فۋدجەيرا امىرلىگىندە جاڭا كوپفۋنكسيونالدى پورت پەن كونتەينەر تەرمينالىن سالۋدى قاراستىرۋدا. فۋدجەيرا ومان شىعاناعىنا شىعا الادى جانە ورمۋز بۇعازىنان تىس ورنالاسقان. جاڭا باعىت كەمەلەرگە ءقاۋىپتى ايماقتى اينالىپ، امىرلىكتەر پورتتارىنا جەتۋگە مۇمكىندىك بەرەدى.
جوبانىڭ ماڭىزدى ءبىر ەرەكشەلىگى بار. جاڭا پورت باا-دە ورنالاسادى، ءبىراق دۋباي امىرلىگىنەن تىس جەردە. Financial Times اتاپ وتكەندەي، مۇنداي قادام ۋاقىت وتە ءدۋبايدىڭ ايماقتاعى باستى لوگيستيكالىق ورتالىق رەتىندەگى ءرولىن وزگەرتۋى مۇمكىن. داعدارىس اياسىندا وزگە دە ايماق ەلدەرى بالاما جولدار ىزدەۋدە. ساۋد ارابياسى، يراك جانە كۋۆەيت پروبلەمالى تەڭىز جولىن اينالىپ وتەتىن ەكسپورت پەن تاسىمالداۋ نۇسقالارىن پىسىقتاۋدا.
اقش بۇدان بۇرىن يران پورتتارىن قايتا قورشاۋعا العان جانە يرانعا جاڭا سوققىلار بەرگەن ەدى. تەگەران جاۋاپ رەتىندە ايماقتاعى امەريكاندىق اسكەري نىساندارعا شابۋىل جاسادى. سوعىس قيمىلدارى سالدارىنان ورمۋز بۇعازى ارقىلى كوممەرسيالىق كەمەلەردىڭ ءجۇرۋى ازايىپ، بۇل تاسىمالداۋدا ۇزىلىستەرگە جانە مۇناي باعاسىنىڭ وسۋىنە اكەلدى. اقش پرەزيدەنتى دونالد ترامپ ورمۋز ارقىلى جۇك تاسىمالىنان 20 پايىزدىق الىم الۋ يدەياسىنان باس تارتىپ، ونىڭ ورنىنا پارسى شىعاناعى ەلدەرىمەن ساۋدا-ينۆەستيسيالىق كەلىسىمدەرگە سۇيەنۋدى كوزدەپ وتىر.