يران اسكەريلەرى ورمۋز بۇعازىندا رۇقسات ەتىلمەگەن باعىتپەن وتۋگە تىرىسقان سۋپەرتانكەر ميناعا سوعىلىپ، ورتەنگەنىن مالىمدەدى، دەپ حابارلايدى infohub.kz سايتى.
باسىلىم Tasnim-گە سىلتەمە جاساپ، ميناعا سوعىلعان سۋپەرتانكەر تۋرالى يران يسلام رەۆوليۋسياسى ساقشىلارى كورپۋسىنىڭ (كسير) وكىلدەرى ايتقانىن جەتكىزدى.
"بىرنەشە ساعات بۇرىن ەرەجەلەردى بۇزعان جانە ورمۋز بۇعازىنىڭ وڭتۇستىك بولىگىندە زاڭسىز جولمەن وتۋگە تىرىسقان سۋپەرتانكەر ەكى تەڭىز ميناسىنا سوعىلىپ، ورتەنىپ، تولىعىمەن توقتاتىلدى"، — دەلىنگەن اسكەريلەردىڭ مالىمدەمەسىندە.
كسير تەڭىز كۇشتەرى بەلگىلەگەن ءوتۋ جانە ءجۇرۋ ەرەجەلەرىن ساقتاۋ مىندەتتى ەكەنىن ەسكە سالدى.
"كەمە قاتىناسىمەن اينالىساتىن كومپانيالار امەريكان اسكەرىنىڭ ارانداتۋىنا بەرىلمەۋى كەرەك (...) جانە ءوز مۇلكى مەن ەكيپاجدارىنىڭ ءومىرىن نەگىزسىز تاۋەكەلگە ۇشىراتپاۋى ءتيىس"، — دەپ ەسكەرتتى اسكەريلەر.
ەسكە سالايىق، بىرنەشە كۇن بۇرىن اقش ورتالىق قولباسشىلىعىنىڭ (CENTCOM) باسشىسى برەد كۋپەر يران تاراپى ورناتقان مينالاردان ورمۋز بۇعازىن تازارتۋ تۋرالى مالىمدەگەن ەدى.
ال بۇگىن اقش تەڭىز مينالارىن ورناتۋدىڭ الدىن الۋ ءۇشىن ورمۋز بۇعازىنداعى يران نىساندارىنا سوققى جاسادى. يران يوردانياداعى اقش اسكەري بازالارىنا جاۋاپ سوققى جاساعانىن مالىمدەدى.