ورتالىق سايلاۋ كوميسسياسى (وسك) «قازاقستان حالىق پارتياسى» قوعامدىق بىرلەستىگىنىڭ پارتيالىق ءتىزىمىن 23 تامىزدا وتەتىن قۇرىلتاي دەپۋتاتتارى سايلاۋىنا تىركەدى. بۇل تۋرالى infohub.kz حابارلايدى.
پارتيا ءتىزىمدى ۇسىنۋ قۇجاتتارىن 9 شىلدەدە وسك-عا تاپسىردى. كانديداتتاردىڭ كونستيتۋسيا جانە سايلاۋ تۋرالى كونستيتۋسيالىق زاڭ تالاپتارىنا سايكەستىگى تەكسەرىلگەننەن كەيىن كوميسسيا تىركەۋ تۋرالى شەشىم قابىلدادى.
وسك مۇشەسى اسەل جاڭابيلوۆانىڭ ايتۋىنشا، پارتيالىق تىزىمگە 72 كانديدات ەنگەن، ونىڭ ىشىندە 30-ى – ايەلدەر، جاستار جانە مۇگەدەكتىگى بار ادامدار. ولاردىڭ ۇلەسى 41،7% قۇرايدى، بۇل زاڭنامادا بەلگىلەنگەن كۆوتاعا سايكەس كەلەدى.
«ورتالىق سايلاۋ كوميسسياسى ۋاكىلەتتى مەملەكەتتىك ورگاندارعا جىبەرگەن سۇراۋلارعا سايكەس، پارتيالىق تىزىمگە ەنگىزىلگەن ادامداردىڭ كونستيتۋسيا جانە سايلاۋ تۋرالى كونستيتۋسيالىق زاڭ تالاپتارىنا سايكەستىگى تەكسەرىلدى. پارتيالىق تىزىمگە ەنگىزىلگەن بارلىق ادام قويىلاتىن تالاپتارعا جاۋاپ بەرەدى»، — دەپ اتاپ ءوتتى اسەل جاڭابيلوۆا.
سونداي-اق ول 2023 جىلعى ءماجىلىس دەپۋتاتتارى سايلاۋىنىڭ قورىتىندىسى بويىنشا قازاقستان حالىق پارتياسى 5%-دان استام داۋىس جيناعانىن، سوندىقتان زاڭعا سايكەس سايلاۋ جارناسىن تولەۋدەن بوساتىلعانىن ەسكە سالدى.
قاجەتتى قۇجاتتارعا قول قويىلعاننان كەيىن ورتالىق سايلاۋ كوميسسياسى پارتيالىق ءتىزىمدى تىركەۋ تۋرالى قاۋلى قابىلدادى. تىركەلگەن كانديداتتارعا ءتيىستى كۋالىكتەر تابىستالدى.