وسكەمەندە ەرتىس وزەنى ارقىلى جاڭا كوپىر سالۋ جۇمىستارى باستالدى. ول ءۇشىن سەرىكبايەۆ كوشەسىن اينالما جولدان باستاپ سالۋ كوزدەلگەن. جاڭا نىسان قالانىڭ نەگىزگى ماگيسترالدەرىندەگى كولىك جۇكتەمەسىن ازايتىپ، وزەن ەكىگە ءبولىپ تۇرعان اۋداندار اراسىنداعى قاتىناستى جاقسارتادى، دەپ حابارلايدى infohub.kz سايتى.
شىعىس قازاقستان وبلىسىنىڭ اكىمى نۇرىمبەت ساقتاعانوۆتىڭ ايتۋىنشا، بۇگىندە وسكەمەندە 140 مىڭعا جۋىق كولىك تىركەلگەن. وڭىرلىك بيلىكتىڭ بولجامىنشا، الداعى 5 جىلدا ولاردىڭ سانى 200 مىڭنان اسۋى مۇمكىن. وسىنداي ءوسىم كەزىندە قازاقستان كوشەسى باعىتىنداعى قازىرگى ينفراقۇرىلىم جايلى قوزعالىسقا جەتكىلىكسىز بولادى.
جاڭا كوپىردىڭ وتكىزۋ قابىلەتى تاۋلىگىنە 80 مىڭعا دەيىن كولىكتى قۇرايدى.
«ەڭ باستىسى – تۇرعىندارعا قولايلى بولۋى، كەپتەلىسسىز تەز ءارى ءقاۋىپسىز جەتۋ مۇمكىندىگى»، – دەپ اتاپ ءوتتى نۇرىمبەت ساقتاعانوۆ.
نىساننىڭ پاسپورتىنا سايكەس، قۇرىلىس 2026-2029 جىلدارعا جوسپارلانعان. جوبا ۇزىندىعى 2،264 كم اۆتوموبيل جولىن، ۇزىندىعى 834،8 م ەرتىس ارقىلى وتەتىن كوپىردى جانە ۇزىندىعى 42،2 م تارماق ارقىلى وتەتىن كوپىردى قامتيدى.
كوپىردە 6 جولاق قاراستىرىلعان. ءجۇرىس بولىگىنىڭ ەنى 26 م بولادى. ءار باعىتتا ەنى 3،5 م 2 جولاقتان، ال شەتكى ەنى 4 م جولاقتار قوعامدىق كولىككە ارنالادى. جولدىڭ ەكى جاعىندا ەنى 2،25 م تروتۋارلار، سونداي-اق ەنى 1،5 م ۆەلوسيپەد جولى سالىنادى.
كوپىر سول جاعالاۋ جاعىنان ءمونوليتتى ارالىق قۇرىلىمدارى بار بولات-تەمىربەتوننان جاسالادى. كىرەبەرىستەردە جۇمساق كىرۋ پليتالارى قاراستىرىلعان.
ەلەكتر جەلىلەرىنە قاتىستى جەكە جۇمىستار كەشەنى بار. مەردىگەر جوعارى ۆولتتى جەلىلەر مەن 7 اۋىر دىڭگەكتى ءجۇرىس بولىگىنەن 26-31 م قاشىقتىققا ورنالاستىرۋى كەرەك. سونىمەن قاتار، 70 كم سىمدى اۋىستىرۋ جوسپارلانۋدا.
وبلىس اكىمى قۇرىلىستىڭ ساپاسى مەن مەرزىمىنىڭ ساقتالۋىن ءتيىستى ورگاندار قاداعالايتىنىن اتاپ ءوتتى.
ءوڭىر باسشىسى كولىك ينفراقۇرىلىمىن دامىتۋدى شىعىس قازاقستاننىڭ تۋريستىك الەۋەتىمەن دە بايلانىستىردى. ونىڭ ايتۋىنشا، قازاقستان پرەزيدەنتى قاسىم-جومارت توقايەۆ ءتۋريزمدى دامىتۋعا ەرەكشە كوڭىل ءبولۋدى تاپسىرعان. ول ءۇشىن زاماناۋي جولدار، كوپىرلەر جانە باسقا دا ينفراقۇرىلىم قاجەت.
جاڭا كوپىر قۇرىلىسىمەن قاتار، وبلىستا تۋريستىك سالانى دامىتۋعا باعىتتالعان باسقا دا جوبالار جۇزەگە اسىرىلۋدا. جاڭا كوپىر قولدانىستاعى باعىتتارداعى كولىك جۇكتەمەسىن ازايتىپ، جول ۋاقىتىن قىسقارتىپ، قوزعالىس قاۋىپسىزدىگىن ارتتىرۋى ءتيىس.