وسكەمەندە پوليسيا قىزمەتكەرلەرى 25 جاستاعى جەرگىلىكتى تۇرعىن جاساعان قىلمىستار سەرياسىن اشتى. ەر ادام بوتەن Mazda كولىگىن مەتاللولومعا تاپسىرىپ، كەيىن تاعى ءبىر كولىكتى ۇرلاپ كەتكەن، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالىندا حابارلانعانداي، قىلمىسكەردىڭ العاشقى قۇربانى Mazda Cronos يەسى بولعان. بۇل كولىك تۇرعىن ءۇيدىڭ اۋلاسىندا ۇزاق ۋاقىت تۇرعان. ەر ادام كولىككە ەشقانداي قۇقىعى بولماسا دا، ءموبيلدى قوسىمشا ارقىلى ەۆاكۋاتور شاقىرىپ، كولىكتى الىپ كەتىپ، مەتالل قابىلداۋ پۋنكتىنە تاپسىرعان.
«وسى ءۇشىن قىلمىسكەر 35 مىڭ تەڭگە العان. يەسىنە شامامەن 1 ملن تەڭگە كولەمىندە شىعىن كەلتىرىلگەن»، — دەلىنگەن حابارلامادا.
ءبىر اپتادان كەيىن ەر ادام تاعى دا قىلمىس جاساعان. قوناقتا ءجۇرىپ، ول دالىزدە قالدىرىلعان LADA 21703 كىلتتەرىن بايقاپ، ولاردى الىپ، يەسىنىڭ رۇقساتىنسىز كولىكپەن كەتىپ قالعان.
«سونىمەن قاتار، كۇدىكتىنىڭ بۇعان دەيىن جەتى جىل مەرزىمگە كولىك جۇرگىزۋ قۇقىعىنان ايىرىلعانى انىقتالدى. پاترۋلدىك پوليسيا قىزمەتكەرلەرى كولىكتى توقتاتقان كەزدە مەديسينالىق كۋالاندىرۋ ونىڭ ەسىرتكىلىك ماساڭ كۇيدە ەكەنىن راستادى — اعزاسىنان كاننابينويدتار تابىلعان»، — دەپ قوستى پوليسيادا.
كۇدىكتىگە قاتىستى قىلمىستىق ىستەر قوزعالدى. ول ۋاقىتشا ۇستاۋ يزولياتورىنا قامالدى.
پوليسيا بوتەن م ۇلىكتى زاڭسىز يەلەنۋ جانە ماساڭ كۇيدە كولىك جۇرگىزۋ زاڭدا كوزدەلگەن جاۋاپكەرشىلىككە اكەپ سوعاتىنىن ەسكەرتتى.