استانادا مىندەتتى الەۋمەتتىك مەديسينالىق ساقتاندىرۋ جۇيەسىنىڭ بيۋدجەت قاراجاتىن جىمقىرۋ ءىسى بويىنشا سوت ۇكىمى شىقتى. تەرگەۋدى استانا قالاسى بويىنشا قارجىلىق مونيتورينگ اگەنتتىگىنىڭ دەپارتامەنتى جۇرگىزگەن، دەپ حابارلايدى infohub.kz سايتى.
انىقتالعانداي، «Forte Clinic (Tumar)» جەكە كلينيكاسىنىڭ باسشىسى مەديسينالىق مەكەمەگە تىركەلگەن ازاماتتار سانىن جاساندى كوبەيتۋ ارقىلى الەۋمەتتىك مەديسينالىق ساقتاندىرۋ قورىنان نەگىزسىز قارجىلاندىرۋ الۋ سحەماسىن ۇيىمداستىرعان. ول سحەمانى ىسكە اسىرۋعا «دەنساۋلىق ساقتاۋدى دامىتۋدىڭ ۇلتتىق عىلىمي ورتالىعى» شجق رمك قىزمەتكەرىن تارتقان. قىزمەتكەر قىزمەتتىك كىرۋ مۇمكىندىگىن پايدالانىپ، پاسيەنتتەردى تىركەۋگە ارنالعان جالعان وتىنىمدەردى زاڭسىز ماقۇلداعان.
وسىلايشا، كلينيكاعا 15 مىڭنان استام ازامات جازباشا ءوتىنىش بويىنشا تىركەلگەن، الايدا قولدانىستاعى ەرەجەلەر مۇنداي نىساندى تەك شەكتەۋلى ادامدار توبىنا عانا رۇقسات ەتەدى. سونداي-اق باسقا وڭىرلەردىڭ تۇرعىندارىن، زاڭدى وكىلدەرىنىڭ قۇجاتى جوق كامەلەتكە تولماعانداردى جانە قازاقستاننان تىس جەردە جۇرگەن ازاماتتاردى تىركەۋ فاكتىلەرى انىقتالعان.
بۇدان بولەك، كلينيكا باسشىسى Damu Med اقپاراتتىق جۇيەسىندەگى مەديسينا قىزمەتكەرلەرىنىڭ ەسەپتىك جازبالارىن باقىلاۋعا الىپ، ولاردى مەكەمە اكىمشىلىگىنىڭ تەلەفون نومىرلەرىنە بايلاعان. ول وسى كىرۋ مۇمكىندىگىن پايدالانىپ، زاڭسىز تىركەلگەن ازاماتتارعا كورسەتىلگەن مەديسينالىق قىزمەتتەر تۋرالى جالعان مالىمەتتەر ەنگىزگەن، بۇل قوردان قارجىلاندىرۋ الۋعا نەگىز بولعان.
مەملەكەتكە كەلتىرىلگەن زالال 79 ميلليون تەڭگەدەن اسقان. سوت ايىپتالۋشىلاردى كىنالى دەپ تانىپ، كلينيكا باسشىسىن بەس جىلعا، ال ۇلتتىق عىلىمي ورتالىق قىزمەتكەرىن ءۇش جىلعا باس بوستاندىعىنان ايىردى. قارجىلىق مونيتورينگ اگەنتتىگىندە زالال تولىق كولەمدە وتەلگەنىن حابارلادى. ۇكىم زاڭدى كۇشىنە ەنگەن.