2025 جىلى «وتباسى بانكىندە» قىزمەتكەرلەر تاراپىنان سىبايلاس جەمقورلىق كورىنىستەرى انىقتالدى. ولار كليەنتتەردىڭ، ريەلتورلاردىڭ، جەكە سوت ورىنداۋشىلارى مەن نوتاريۋستاردىڭ مۇددەسىن لوببيلەگەنى، سونداي-اق تۇرعىن ءۇي كەزەگىن جىلجىتقانى ءۇشىن زاڭسىز سىياقى العان. بۇدان بولەك، ءبىر فيليال قىزمەتكەرى كليەنتتەردىڭ نەسيە قابىلەتتىلىگىن راستايتىن جالعان كىرىس قۇجاتتارىن جاساپ، ولاردى نەسيە وتىنىمدەرىنە تىركەگەن، دەپ حابارلايدى infohub.kz سايتى.
KASE-دە جاريالانعان بانكتىڭ 2025 جىلعى ەسەبىنە سايكەس، انىقتالعان فاكتىلەر بويىنشا اتالعان قىزمەتكەرلەرمەن ەڭبەك شارتتارى جۇمىس بەرۋشىنىڭ باستاماسىمەن سەنىم جوعالتۋىنا بايلانىستى توقتاتىلعان. بانكتە بۇل قىزمەتكەرلەردى قىلمىستىق جاۋاپكەرشىلىككە تارتۋ تۋرالى وتىنىشتەر جىبەرىلگەنى، قازىرگى ۋاقىتتا قۇقىق قورعاۋ ورگاندارى ءبىرقاتار قىلمىستىق ىستەر بويىنشا سوتقا دەيىنگى تەرگەۋ جۇرگىزىپ جاتقانى اتاپ ءوتىلدى.