«وتباسى بانك» ازيا دامۋ بانكىنە «ۇماي» جەڭىلدەتىلگەن يپوتەكاسى بويىنشا ەكىنشى ترانشتى مەرزىمىنەن بۇرىن بەرۋدى سۇراپ حات جولدادى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە بانك باسقارماسى ءتوراعاسىنىڭ ورىنباسارى جانسۇلتان ماتاي ايتتى، دەپ حابارلايدى infohub.kz.
ەكىنشى ترانشتى مەرزىمىنەن بۇرىن ءبولۋ قاجەتتىلىگى قازاقستاندىق ايەلدەر اراسىنداعى سۇرانىستىڭ جوعارىلىعىنا بايلانىستى تۋىندادى. ماتايدىڭ ايتۋىنشا، باعدارلاما باستالعان كۇنى 855 ءوتىنىش قابىلدانعان. بارلىق قاتىسۋشى ايەلدەر الدىن الا ماقۇلداۋ الىپ، ەندى نەسيە راسىمدەۋ ءۇشىن تۇرعىن ءۇي ىزدەۋمەن اينالىسۋدا.
سونىمەن قاتار جانسۇلتان ماتاي ايەلدەر يپوتەكاسىنا دەگەن جوعارى سۇرانىس قاتىسۋشىلاردى ىرىكتەۋ كريتەريلەرىنە اسەر ەتپەيتىنىن قوستى.
«باعدارلاماعا قاتىسۋشىلار اراسىندا سۇرالعان نەسيەنىڭ ورتاشا سوماسى 23،4 ملن تەڭگەنى قۇرادى. ەڭ جاس قاتىسۋشى — 18 جاستا، ەڭ ۇلكەنى — 63 جاستا. قاتىسۋشىلاردىڭ ورتاشا جاسى 39-دا»، — دەپ ناقتىلادى ول.
باسقارما ءتوراعاسىنىڭ ورىنباسارى باعدارلامانى ازيا دامۋ بانكى قارجىلاندىراتىنىن ەسكە سالدى. ءبىرىنشى ترانش اياسىندا ول 9 ملرد تەڭگە بولگەن، الايدا «وتباسى بانك» قالعان بولىگىن مەرزىمىنەن بۇرىن الۋعا ۇمىتتەنىپ وتىر.
«وتىنىشتەردى قابىلداۋدىڭ كەلەسى كۇنى تۋرالى قوسىمشا حابارلايمىز. جالپى، قارجىلاندىرىلاتىن باعدارلاماعا 90 ملرد تەڭگە قاراستىرىلعان»، — دەپ قورىتىندىلادى سپيكەر.
بۇعان دەيىن «كۋرسيۆ» باعدارلاماعا رەسمي تابىسى جانە سوڭعى التى ايدا كەمىندە زەينەتاقى اۋدارىمدارى بار جۇمىس ىستەيتىن ايەلدەر قاتىسا الاتىنىن جازعان. نەسيەنىڭ ەڭ جوعارى سوماسى 50 ملن تەڭگەگە دەيىن، ال يپوتەكانى التى ايدان 25 جىلعا دەيىنگى مەرزىمگە راسىمدەۋگە بولادى.