بيولوگتار ىستىق بۇلاقتاردا تىرشىلىك ەتە الاتىن ەۋكاريوتتىق ورگانيزم تاپتى. بۇل عىلىمنىڭ تىرشىلىك ورتاسى تۋرالى تۇسىنىگىن وزگەرتەدى، دەپ حابارلايدى infohub.kz سايتى.
امەبانىڭ جاڭا ءتۇرى Incendiamoeba cascadensis دەپ اتالدى، ول «وتتى امەبا» دەگەن اتپەن دە بەلگىلى. بۇل ميكروورگانيزم كۇردەلى ەۋكاريوتتىق ورگانيزمدەر اراسىندا تەرموتوزىمدىلىك رەكوردىن جاڭارتتى. ۇلگىلەر كاليفورنيا شتاتىنداعى لاسسەن-ۆولكانيك ۇلتتىق پاركىنىڭ ىستىق گەوتەرمالدىق بۇلاقتارىنان جينالعان.
NASA گرانتى قولداعان بۇل جاڭالىق «Cell» عىلىمي جۋرنالىندا جاريالاندى. بۇرىن ەۋكاريوتتاردىڭ كۇردەلى جاسۋشالارى اسا جوعارى تەمپەراتۋرادا كوبەيىپ، بەلسەندى جۇمىس ىستەي المايدى دەپ ەسەپتەلگەن. الايدا تابىلعان امەبا 57–63 گرادۋس سەلسيدە تىرشىلىگىن ساقتاپ، بولىنەدى، سونداي-اق جوعارىراق تەمپەراتۋراداعى قىسقا مەرزىمدى قىزۋدى دا كوتەرەدى.
سيراكۋز ۋنيۆەرسيتەتىنىڭ زەرتتەۋشىلەرى، اتاپ ايتقاندا بەريل راپپاپورت پەن اندجەلا وليۆەريو، بۇل دەرەكتەر كۇردەلى ورگانيكالىق تىرشىلىكتىڭ توزىمدىلىك شەگى عىلىم ويلاعاننان الدەقايدا كەڭ ەكەنىن دالەلدەيدى دەيدى.
جاڭالىق استروبيولوگيا مەن جەردەن تىس وركەنيەتتەردى نەمەسە ميكروورگانيزمدەردى ىزدەۋ ءۇشىن ماڭىزدى. وسىنداي ەكسترەموفيلدەر ەۋكاريوتتىق تىرشىلىك بۇرىن كۇردەلى تىرشىلىك فورمالارىنا جارامسىز دەپ سانالعان، گەوتەرمالدىق بەلسەندىلىگى جوعارى ىستىق ەكزوپلانەتالار مەن سۋ الەمدەرىندە دە بولۋى مۇمكىن ەكەنىن كورسەتەدى.