ويىن يندۋسترياسى كونسولدەر، اكسەسسۋارلار جانە ويىن ديسكتەرىنىڭ ساتىلىمىنىڭ كۇرت تومەندەۋىنە تاپ بولدى، بۇعان باعانىڭ ءوسۋى سەبەپ بولدى. قىركۇيەكتەن باستاپ جاڭا ويىن كونسولدەرىنىڭ قۇنى شىققان كەزدەگى باستاپقى باعاسىنان اسىپ كەتەدى، دەپ حابارلايدى infohub.kz.
وندىرۋشىلەر قۇرىلعىلارعا، قوسالقى بولشەكتەرگە جانە ويىندارعا سۇرانىستىڭ تومەندەگەنىن اتاپ وتۋدە. شىلدە ايىندا امەريكاندىق پايدالانۋشىلاردىڭ ويىن جابدىقتارىنا جۇمساعان شىعىندارى وتكەن جىلدىڭ سايكەس كەزەڭىمەن سالىستىرعاندا 29%-عا تومەندەدى. Circana اناليتيكالىق كومپانياسىنىڭ دەرەكتەرى بويىنشا، مۇنداي تومەن ساتىلىم كورسەتكىشتەرى پاندەميا باستالعالى بەرى بايقالماعان.
داعدارىستىڭ باستى سەبەبى — جەدەل جاد پەن باسقا دا كومپونەنتتەر باعاسىنىڭ كۇرت ءوسۋى. جاساندى ينتەللەكت ازىرلەۋشىلەرىنىڭ چيپتەرگە سۇرانىسى نارىقتا قوسالقى بولشەكتەردىڭ تاپشىلىعىن تۋدىردى. ناتيجەسىندە Xbox Series X جانە PlayStation 5 كونسولدەرىنىڭ قۇنى جۇزدەگەن دوللارعا ءوستى. وندىرۋشىلەر ەندى ويىن ساتىلىمىنان تۇسەتىن تابىسپەن وتەۋگە ەسەپتەسىپ، قۇرىلعىلاردى شىعىنعا ساتا المايدى.
يندۋستريا تاريحىندا العاش رەت التى جىلدىق كونسولدەر شىققان كۇنگى باعاسىنان قىمبات تۇر. Xbox باسشىسى اشا شارما بۇقارالىق ساتىپ الۋشىنىڭ ەندى ويىندارعا مىڭداعان دوللار جۇمساۋعا دايىن ەمەستىگىن مويىندادى. ءىرى كومپانيالاردىڭ باسشىلىعى جاڭا بيزنەس-مودەلدەردى ىزدەۋدە، ويتكەنى قازىرگى داعدارىس كونسولدىك گەيمينگتەن تۇتاس ءبىر ۇرپاق ويىنشىلاردى الىستاتۋى مۇمكىن.