وزبەكستاندا ون ءتورت جاسقا تولماعان بالالاردى زورلاعانى ءۇشىن ءومىر بويى باس بوستاندىعىنان ايىرۋ جازاسىن ەنگىزۋ ۇسىنىلدى. ءتيىستى زاڭنامالىق تۇزەتۋلەردى وزبەكستان ولي ءماجىلىسىنىڭ زاڭناما پالاتاسى ءبىرىنشى وقىلىمدا قابىلدادى، دەپ حابارلايدى infohub.kz سايتى.
NUR.KZء-تىڭ وزبەكستان ولي ءماجىلىسىنىڭ زاڭناما پالاتاسىنا سىلتەمە جاساپ حابارلاۋىنشا، زاڭ جوباسى بالالارعا قارسى جاسالعان جەكەلەگەن اسا اۋىر جىنىستىق قىلمىستار ءۇشىن ءومىر بويى باس بوستاندىعىنان ايىرۋدى كوزدەيدى.
«سونداي-اق زاڭ جوباسىندا بالالارعا قاتىستى جىنىستىق زورلىق-زومبىلىق پەن قول سۇعۋشىلىق ءۇشىن جازا شارالارىن قاتاڭداتۋعا، زورلىق-زومبىلىق قۇرباندارى بولعان كامەلەتكە تولماعانداردىڭ قۇقىقتىق قورعالۋىن كۇشەيتۋگە، وسىنداي جاعدايلاردىڭ الدىن الۋعا، سونداي-اق ءتيىستى ۇيىمدار مەن لاۋازىمدى تۇلعالاردىڭ جاۋاپكەرشىلىگىن ارتتىرۋعا باعىتتالعان نورمالار كورىنىس تاپقان»، — دەلىنگەن زاڭناما پالاتاسىنىڭ حابارلاماسىندا.
قۇجاتتىڭ جەكەلەگەن ەرەجەلەرى اسا اۋىر جىنىستىق قىلمىستارعا قاتىستى. ولار ءۇشىن ۇزاق مەرزىمگە باس بوستاندىعىنان ايىرۋ نە ءومىر بويى باس بوستاندىعىنان ايىرۋ بەلگىلەۋ ۇسىنىلىپ وتىر.
«ەڭ الدىمەن بالالارعا قاتىستى جاسالعان اسا اۋىر جىنىستىق قىلمىستار ءۇشىن جازانى تۇبەگەيلى قاتاڭداتۋ ۇسىنىلادى. اتاپ ايتقاندا، ون ءتورت جاسقا تولماعان ادامدى زورلاعانى نەمەسە جىنىستىق قاجەتتىلىكتى تابيعاتقا جاتپايتىن نىساندا كۇشتەپ قاناعاتتاندىرعانى ءۇشىن ۇزاق مەرزىمگە باس بوستاندىعىنان ايىرۋ نە ءومىر بويى باس بوستاندىعىنان ايىرۋ بەلگىلەۋ كوزدەلىپ وتىر»، — دەلىنگەن جاريالانىمدا.