25 قىركۇيەككە قاراعان تاڭدا وزبەكستاندا گەنەراسيا اجىراتىلۋىنان قازاقستاننىڭ ءبىرتۇتاس ەلەكتر ەنەرگەتيكالىق جۇيەسىندە ىركىلىس بولدى. بۇل تۋرالى infohub.kz سايتى حابارلايدى.
جۇيەلىك وپەراتور KEGOC دەرەگىنشە، تاڭعى 05.02-دە وزبەكستاننىڭ ەنەرگوجۇيەسىندە قۋاتى 1 516 مەگاۆاتت گەنەراسيا جوعالدى. وسى ىركىلىس ورتالىق ازيانىڭ بىرىككەن ەنەرگوجۇيەسى تاراپىنان قۋاتتىڭ كۇرت ارتۋىنا اكەپ سوقتى. سالدارىنان «سولتۇستىك — وڭتۇستىك» ءترانزيتى كەنەتتەن ءبولىنىپ كەتتى.
ىركىلىس سالدارىنان قازاقستاندىق تۇتىنۋشىلارعا ۋاقىتشا شەكتەۋ قويىلدى. رەسپۋبليكا ەنەرگوجۇيەسىندەگى اجىراتىلعان جۇكتەمەنىڭ جالپى كولەمى 962 مەگاۆاتت بولدى. كومپانيادا اپاتقا قارسى اۆتوماتيكانىڭ قالىپتى رەجيمدە ىستەگەنىن اتاپ ءوتتى.
ماماندار جاعدايدى جەدەل تۇراقتاندىردى. 05.43-تە قازاقستان ەنەرگوجۇيەسىنىڭ وڭتۇستىك ايماعى مەن ورتالىق ازيانىڭ بىرىككەن ەنەرگوجۇيەسىنىڭ پاراللەل جۇمىسى تولىق قالپىنا كەلتىرىلدى. وپەراتور تۇتىنۋشىلار ءۇشىن بارلىق شەكتەۋدى الۋعا كوماندا بەردى.
KEGOC ۇلتتىق كومپانياسى ەلدىڭ ءبىرتۇتاس ەلەكتر ەنەرگەتيكالىق جۇيەسىنىڭ جۇيەلىك وپەراتورى سانالادى. كاسىپورىن 1996 جىلى قۇرىلعان جانە ۇلتتىق ەلەكتر جەلىسىن باسقارادى. نەگىزگى اكسيونەرى — 85% ۇلەسىمەن «سامۇرىق-قازىنا» قورى، قالعان 15% اكسياسى KASE جانە AIX بيرجالارىندا اينالىمدا ءجۇر.
2026 جىلدىڭ ءبىرىنشى جارتىجىلدىعىنىڭ قورىتىندىسى بويىنشا كومپانيانىڭ ءتۇسىمى 240،1 ملرد تەڭگەگە جەتىپ، وتكەن جىلمەن سالىستىرعاندا 31،1 پايىزعا ءوستى. وپەراتوردىڭ تازا پايداسى 59،4 پايىزعا ارتىپ، 54،6 ملرد تەڭگە بولدى. كاسىپورىننىڭ اكتيۆتەرى ماۋسىم ايىنىڭ سوڭىندا 1،22 ترلن تەڭگەگە جەتتى.
سوڭعى ايلاردا قازاقستاندىق ەنەرگوجۇيە بىرنەشە وقيعاعا تاپ بولدى. اعىمداعى جىلدىڭ تامىز ايىنىڭ ورتاسىندا الماتىدا بلەكاۋت بولدى. كەيىن 25 تامىزدا KEGOC جەلىلەرىندەگى كەزەكتى ىركىلىس شىمكەنت مۇناي وڭدەۋ زاۋىتىنداعى جابدىقتىڭ اپاتتىق توقتاۋىنا سەبەپ بولدى.