امەريكالىق رەپەر شون كومبستىڭ (P. Diddy) مۇددەسىن قورعاعان Sher Tremonte زاڭ فيرماسى تولەنبەگەن شوتتار مەن كليەنتپەن بايلانىستىڭ تولىق ءۇزىلۋىن سىلتاۋراتىپ، ودان ءارى قورعاۋدان باس تارتتى. زاڭگەرلەر ءتيىستى ءوتىنىشتى سوتقا جولدادى، دەپ حابارلايدى infohub.kz سايتى.
فيرما كومبستى سوماسى 100 ميلليون دوللاردان اساتىن جالا جابۋ تۋرالىشۋلى ىستە قورعاعان. ادۆوكاتتاردىڭ مالىمدەۋىنشە، رەپەر جارتى جىلدان استام ۋاقىت بويى قالاماقى تولەمەگەن، سوت شىعىندارى مەن وزگە دە شىعىستاردى وتەمەگەن.
«كومبس قالاماقىنىڭ، شىعىندار مەن وتەماقىلاردىڭ ەداۋىر قالدىعىن تولەمەدى»، — دەپ كەلتىرەدى فيرما سەرىكتەسى مايكل ترەمونتەنىڭ ءسوزىن The Guardian.
سونىمەن قاتار زاڭگەرلەر سوڭعى ءتورت اي ىشىندە P. Diddy ۋاقتىلى ءارى مازمۇندى كەلىسسوزدەردەن جالتارعانىن ايتادى. ناتيجەسىندە ىنتىماقتاستىق ءىس جۇزىندە توقتاپ، ادۆوكاتتار ونىڭ مۇددەسىن بۇدان بىلاي ءتيىمدى قورعاي المايتىن جاعدايعا جەتتى.
كومبستىڭ ءوزى زاڭگەرلەر توبىن اۋىستىرۋدى ءبىرىنشى بولىپ ءوزى شەشكەنىن مالىمدەيدى. رەپەر فيرمانى قىزمەت قۇنىن اسىرا كورسەتىپ، وزىمەن كەلىسىلمەگەن شوتتاردى ۇسىندى دەپ ايىپتادى. Sher Tremonte بۇل تالاپتاردى جوققا شىعاردى.
كومبستىڭ تالاپ-ارىزى مۋزىكالىق مەنەدجەر كورتني بەردجەسكە، ادۆوكات اريەل ميچەللگە جانە NewsNation تەلەارناسىنا يەلىك ەتەتىن Nexstar مەدياكومپانياسىنا قارسى قويىلعان. رەپەر ولاردى اتاقتى ادامدار مەن كامەلەتكە تولماعاندارعا جاسالعان جىنىستىق زورلىق-زومبىلىق تۋرالى بەينەجازبالار بار دەگەن جالعان مالىمدەمەلەر تاراتتى دەپ ايىپتايدى.
قازىرگى تاڭدا P. Diddy 50 ايلىق جازاسىن وتەپ جاتىر. القابيلەر ونى قورقىتىپ الۋ جانە سەكس-ساۋدا جاساۋ ايىپتارى بويىنشا اقتادى، الايدا جەزوكشەلىكپەن اينالىسۋ ءۇشىن ادام تاسىمالداۋدىڭ ەكى ەپيزودى بويىنشا كىنالى دەپ تانىدى.