پاكىستان استاناسىنداعى ءىرى مەملەكەتتىك اۋرۋحانانىڭ جاڭا تۋعان نارەستەلەر بولىمشەسىندە تاڭەرتەڭ ءورت شىعىپ، 14 ءسابي قازا تاپتى. بۇل تۋرالى اۋرۋحانا اكىمشىلىگى مەن ۇكىمەت حابارلادى. پاكىستان مەديسينا عىلىمدارى ينستيتۋتىنىڭ نارەستەلەر بولىمشەسىندە ءورت كەزىندە كەمىندە 15 ءسابي بولعان. ولاردىڭ بىرەۋى عانا امان قالدى.
قۇتقارۋشىلاردىڭ مالىمەتىنشە، ءورت تاڭعى 6:45 شاماسىندا باستالعان. بولجام بويىنشا، اۋرۋحانانىڭ گينەكولوگيا بولىمشەسىندەگى نارەستەلەر پالاتاسىندا اۋا باپتاعىش قۇرىلعىنىڭ كومپرەسسورى جارىلىپ، ءورت تۇتانعان. ءورت سوندىرۋشىلەر وقيعا ورنىنا تەز جەتىپ، جالىندى اۋىزدىقتادى. قۇتقارۋ توپتارى عيماراتتى سالقىنداتۋ جۇمىستارىن جۇرگىزىپ جاتىر، دەپ حابارلايدى جەرگىلىكتى ب ا ق.
اۋرۋحانا وكىلى تۇسىنىكتەمە سۇراعان قوڭىراۋلارعا دەرەۋ جاۋاپ بەرمەدى. پرەمەر-مينيستر شەحباز شاريف قازا بولعاندارعا كوڭىل ايتىپ، وقيعا بويىنشا دەرەۋ تەرگەۋ باستاۋدى تاپسىردى. ونىڭ كەڭسەسى تاراتقان مالىمدەمەدە 14 ءسابيدىڭ قازا تاپقانى راستالدى. «بالالارعا قاتىستى بولعان قايعىلى وقيعا – ورنى تولماس شىعىن»، – دەدى شاريف.