پاكىستاننىڭ سولتۇستىك-باتىسىنداعى سۆات ايماعىندا تارتىپسىزدىكتەرگە قارسى وتكەن ميتينگىدە جاسالعان جارىلىس سالدارىنان كەمىندە 14 ادام قازا تاۋىپ، تاعى 20-دان استام ادام جاراقات الدى. بۇل تۋرالى infohub.kz سايتى حابارلايدى.
وقيعا حايبەر-پاحتۋنحۆا پروۆينسياسىنىڭ كابال قالاسىندا بولدى. پوليسيا باستىعى ومار حاننىڭ ايتۋىنشا، پوليسيا بولىمشەسىنىڭ جانىندا جينالعان دەمونسترانتتار تارتىپسىزدىكتەرگە قارسى ۇراندار ايتىپ، بەيبىتشىلىك تالاپ ەتكەن. سول كەزدە شابۋىلشى جارىلعىش زاتتى ىسكە قوسقان.
پروۆينسيالىق جەدەل جاردەم قىزمەتىنىڭ وكىلى بيلال ءفايزيدىڭ مالىمەتىنشە، جارىلىس كەزىندە قازا تاپقانداردىڭ اراسىندا كەمىندە بەس پوليسيا قىزمەتكەرى بار. پاكىستاننىڭ ىشكى ىستەر ءمينيسترى موحسين ناكۆي بۇل شابۋىلدى قاتاڭ ايىپتاپ، قۇربانداردىڭ وتباسىلارىنا كوڭىل ايتىپ، جاراقات العانداردىڭ تەزىرەك ساۋىعۋىن تىلەدى.
سۆات ايماعى بۇرىن يسلامدىق لاڭكەستەردىڭ تىرەگى بولعان. ولار قاتاڭ شاريعات زاڭدارىن ەنگىزگەن ەدى. 2007 جىلى پاكىستان اسكەرى ءىرى وپەراسيا جۇرگىزىپ، ولاردى قۋىپ شىعىپ، ۇكىمەت باقىلاۋىن قالپىنا كەلتىردى.
ازىرگە ەشبىر توپ جارىلىسقا جاۋاپكەرشىلىكتى ءوز موينىنا العان جوق. الايدا كۇدىك پاكىستان تاليبتەرىنە، ياعني تەحريك-ە-تاليبان پاكىستان (تتپ) ۇيىمىنا اۋىپ وتىر. تتپ اۋعانستانداعى تاليبتەر بيلىگىنەن بولەك، ءبىراق ولارمەن وداقتاس. تاليبتەر 2021 جىلى اۋعانستاندا بيلىككە قايتا كەلگەننەن بەرى تتپ كوشباسشىلارى مەن جاۋىنگەرلەرىنىڭ كوپشىلىگى سول جەردەن پانا تاپقان.
پاكىستان اۋعانستانداعى تاليبتەر ۇكىمەتىن تتپ لاڭكەستەرىن جاسىرىپ وتىر دەپ ايىپتاپ كەلەدى، ءبىراق كابۋل بۇل ايىپتاۋدى جوققا شىعارادى. سوڭعى جىلدارى پاكىستاندا، اسىرەسە پوليسيا مەن قاۋىپسىزدىك كۇشتەرىنە باعىتتالعان لاڭكەستىك شابۋىلدار جيىلەپ كەتكەن.