كاليفورنيانىڭ فەدەرالدىق سوتى Paramount Skydance پەن Warner Bros. Discovery سياقتى ءىرى گولليۆۋد ستۋديالارىنىڭ بىرىگۋ ۋاعدالاستىعىن ۋاقىتشا توقتاتتى. 12 شتاتتان قۇرىلعان كواليسيا تالاپ-ارىز بەرىپ، بۇل بىرىگۋ نارىقتاعى باسەكەلەستىككە ەلەۋلى قاتەر توندىرەتىنىن مالىمدەگەن ەدى، دەپ حابارلايدى infohub.kz.
فەدەرالدىق سۋديا اراسەلي مارتينەس-ولگين كاليفورنيا باس پروكۋرورى روب بونتانىڭ جانە تاعى 11 شتات وكىلدەرىنىڭ مامىلەنى توقتاتا تۇرۋ تۋرالى ءوتىنىشىن قاناعاتتاندىردى. سوت قاۋلىسى كومپانيالاردىڭ بىرىگۋىنە قاتىستى كەز كەلگەن ارەكەتتى كەمىندە 14 كۇنگە بۇعاتتايدى. تىيىمدى سوت تالقىلاۋىنىڭ بۇكىل كەزەڭىنە ۇزارتۋ ماسەلەسى بويىنشا تىڭداۋلار 3 تامىزعا بەلگىلەنگەن.
تالاپكەرلەر اقش-تىڭ بەس ءىرى كينوديستريبيۋتورىنىڭ ەكەۋىنىڭ بىرىگۋى مونوپولياعا قارسى زاڭنامانى بۇزاتىنىن العا تارتادى. پروكۋرورلاردىڭ پىكىرىنشە، مامىلە باعانىڭ وسۋىنە، كونتەنت ساپاسىنىڭ تومەندەۋىنە اكەلىپ، كينوتەاترلار مەن كابەل وپەراتورلارىنا زيان كەلتىرەدى. كومپانيالاردىڭ نارىقتاعى بىرلەسكەن ۇلەسى 27 پايىزعا جەتۋى مۇمكىن.
Paramount وكىلدەرى سوتتىڭ تالقىلاۋ كەزەڭىندەگى ستاتۋس-كۆونى ساقتاپ قالعان جەدەل شەشىمىنە العىس ءبىلدىردى. كومپانيادا مامىلەنى زاڭدى جانە كورەرمەندەر مەن بۇكىل يندۋستريا ءۇشىن پايدالى دەپ سانايتىندارىن اتاپ ءوتتى. سوت تۇپكىلىكتى شەشىمدى الداعى اپتالاردا قابىلداۋى ءتيىس.