پاريج استىنان ەجەلگى قابىرعا تابىلدى. بۇل جاڭالىق قالانىڭ العاشقى قونىسى ورنالاسقان جەردى راستاۋى مۇمكىن. فرانسيا مادەنيەت مينيسترلىگى بۇل ارحەولوگيالىق ولجانى «زور جەتىستىك» دەپ باعالادى، دەپ حابارلايدى infohub.kz سايتى.
گاللو-ريم داۋىرىنەن جەتكەن شامامەن 20 مەترلىك قابىرعا بولىگى وسى جازدا ءپاريجدىڭ جۇرەگىندە، نوتر-دام سوبورىنىڭ ماڭىنداعى سيتە ارالىنداعى عيمارات استىنان تابىلدى. تاس پەن اعاشتان تۇرعىزىلعان قۇرىلىم — تەمىر داۋىرىندە سەنا وزەنىنىڭ جاعاسىندا ءومىر سۇرگەن گالل پاريزي تايپاسى سالعان ليۋتەسيا بەكىنىسىنىڭ ءبىر بولشەگى بولۋى مۇمكىن. ليۋتەسيا — ءپاريجدىڭ ەجەلگى اتاۋى.
سيتە ارالى ءداستۇرلى تۇردە ليۋتەسيانىڭ ورتالىعى سانالىپ كەلگەن. الايدا كەيبىر ارحەولوگيالىق زەرتتەۋلەرگە سۇيەنگەن قارسى پىكىر بويىنشا، ول باتىستاعى نانتەر قالا ماڭىندا ورنالاسقان.
«ءبىز گالل ليۋتەسياسىن ءتۇسىنۋ ءۇشىن تابىلعان ەڭ ماڭىزدى جادىگەرلەردىڭ ءبىرىن كورىپ وتىرعان بولۋىمىز مۇمكىن. عىلىمي ساقتىق ونىڭ قىزمەتى مەن حرونولوگياسىن ءالى دە تەكسەرۋدى تالاپ ەتەدى، ءبىراق وسى كەزەڭدە دالەلدەردىڭ توعىسۋى ەرەكشە تاڭعالارلىق»، — دەدى مادەنيەت ءمينيسترى كاترين پەگار سارسەنبىدە جاساعان مالىمدەمەسىندە.
ليۋتەسيا العاش رەت يۋلي سەزاردىڭ «گالل سوعىسى» كىتابىنىڭ جەتىنشى بولىمىندە اتالعان. وندا قالا سەنا وزەنىندەگى ارالدا ورنالاسقان دەپ جازىلعان. بۇل تىم جالپى سيپاتتاما ونىڭ ورنى تۋرالى كوپتەگەن بولجامعا جول اشقان.
وتەل-دو اۋرۋحاناسىنىڭ استىنداعى قازبا جۇمىستارى بارىسىندا تابىلعان قابىرعادا ءورت ىزدەرى بار. بۇل سەزاردىڭ گاللدار ليۋتەسيا شايقاسى الدىندا ءوز قالاسىن ورتەپ جىبەرگەنى تۋرالى جازباسىنا سايكەس كەلۋى مۇمكىن. مينيسترلىك مالىمدەمەسىندە كۇيگەن زاتتاردى كومىرتەكتى تالداۋ ناتيجەسى ولجانى ءبىزدىڭ داۋىرىمىزگە دەيىنگى 200 جىل مەن 10 جىل ارالىعىنا جاتقىزدى. بۇل ۋاقىت ارالىعى ءبىزدىڭ داۋىرىمىزگە دەيىنگى 52 جىلعى ليۋتەسيا شايقاسىن قامتيدى.
سيتە ارالى — پاريج ايماعىنداعى سەنا وزەنىندەگى ەڭ ۇلكەن ارال. ول ليۋتەسيا ريمدىك قونىسىنىڭ ورتالىعىنا اينالعان.