21-23 تامىز ارالىعىندا الماتىداعى پەرۆوماي توعاندارى اۋماعىندا Park Live Almaty فەستيۆالى ءوتىپ، ءۇش كۇندە 60 مىڭ كەلۋشىنى جينادى. كورەرمەندەر شەتەلدىك جانە قازاقستاندىق ارتىستەردىڭ ونەرىن تاماشالاۋعا كەلدى، دەپ حابارلايدى infohub.kz سايتى.
فەستيۆالدىڭ حەدلاينەرلەرى — امەريكالىق روك-مۋزىكانت دجەك ۋايت، بريتاندىق Gorillaz توبى جانە پانك-روكەرلەر The Offspring. سونداي-اق ساحنادا The Kills، Bloodywood، CeeLo Green، De La Soul، Glassjaw، Dequine، Dirty Ctrl، Pigz، Kezeñ جانە رەسەيلىك «پورەز نا سوباكە» توبى ونەر كورسەتتى.
فەستيۆالدىڭ باس سەرىكتەسى — Freedom حولدينگى. كومپانيا الاڭىندا كۆەست، مۋزىكالىق باتتل، سەرف-رودەو، VR-ويىن جانە باسقا دا ويىن-ساۋىقتار ۇيىمداستىرىلدى. كەلۋشىلەر Freedom SuperApp سەرۆيستەرىمەن دە تانىسا الدى.
ءۇش كۇن بويى ءبىر الاڭدا ءارتۇرلى جانر مەن ۇرپاق وكىلدەرى باس قوستى. اسىرەسە 22 تامىزداعى Gorillaz كونسەرتى كورەرمەندى كوپ جينادى: بۇل كۇنى پەرۆوماي توعاندارى فەستيۆالگە كەلگەن ونداعان مىڭ ادامعا تولى بولدى.
الايدا مۇنداي اۋقىمنىڭ كەرى جاعى دا بار ەكەنىن اتاپ وتكەن ءجون. 60 مىڭ ادام — بۇل الماتى ماڭىندا ءتيىستى ينفراقۇرىلىمى بار جەكە الاڭدى قاجەت ەتەتىن كولەم. پەرۆوماي توعاندارى مۇنداي جاپپاي ءىس-شارالارعا ارنالماعانى انىق. فەستيۆال كەزىندە قوناقتار كەپتەلىس، تاكسي باعاسىنىڭ قىمباتتىعى، كولىك تاپشىلىعى، كىرۋ مەن شىعۋدىڭ قيىندىعىنا شاعىمداندى.
بۇعان دەيىن Kursiv LifeStyle Park Live قوناقتارى كولىك قوياتىن ورىن ىزدەپ جۇرگەندە، جەرگىلىكتى تۇرعىندار كولىك اعىنىنان اقشا تابۋدى ۇيعارعانىن جازعان.