پاركينسون اۋرۋى كوپ ادامعا قولدىڭ دىرىلدەۋىمەن بايلانىستى كورىنەدى. الايدا بۇل اۋرۋدىڭ بەلگىلەرى تەك ترەمورمەن شەكتەلمەيدى. كەيبىر وزگەرىستەردى ادام دارىگەرگە بارماي تۇرىپ-اق بايقاۋى مۇمكىن. ۆلاديۆوستوكتىق نەۆرولوگ ارتەم رەزنيچەنكو الەۋمەتتىك جەلىلەرىندە ءۇي جاعدايىندا ءوزى تەكسەرۋگە بولاتىن ءۇش بەلگىنى ايتتى، دەپ حابارلايدى infohub.kz سايتى.
ءبىرىنشى بەلگى — قوزعالىستىڭ باياۋلاۋى. ادامنىڭ ەكى قولىمەن قيمىلدى قانشالىقتى جىلدام جانە بىردەي جاسايتىنىن تەكسەرۋ كەرەك. ودان ساۋساقتارىن جىلدام بۇگىپ-جازۋدى نەمەسە قايتالاناتىن قيمىلدار جاساۋدى سۇراۋعا بولادى. ەگەر ءبىر قول ەكىنشىسىنەن ايتارلىقتاي قالىپ قويسا، بۇل براديكينەزيانىڭ — قوزعالىستىڭ باياۋلاۋىنىڭ بەلگىسى بولۋى مۇمكىن.
ەكىنشى سيمپتوم — بۇلشىقەت تونۋسىنىڭ جوعارىلاۋى، ياعني ريگيدتىلىك، بۇلشىقەتتىڭ قاتايىپ، ەرىكسىز قوزعالىسقا قارسىلىق كورسەتۋى. «ناۋقاستا بايقالاتىن العاشقى سيمپتومدار — تونۋستىڭ جوعارىلاۋى جانە قوزعالىستىڭ باياۋلاۋى»، — دەيدى دارىگەر. ول ادام ءوزى اياق-قولىن كەرمەي تۇرعاندا، ونىڭ قولىن شىنتاق بۋىنىنان ابايلاپ بۇگىپ-جازۋدى ۇسىنادى. ەگەر قوزعالىس ادەتتەن تىس قاتتى سەزىلىپ، قول وعان قارسىلاسقانداي بولسا، بۇل ريگيدتىلىكتى كورسەتۋى مۇمكىن. پاركينسون اۋرۋىندا مۇنداي قاتايىپ قالۋ قولدى، اياقتى نەمەسە تۇلعانى قامتۋى مۇمكىن. ۇقساس بەلگىلەر تەك پاركينسوندا ەمەس، باسقا دا جاعدايلاردا كەزدەسەدى.
ءۇشىنشى بەلگى — تىنىشتىق كۇيىندەگى ترەمور، ياعني اياق-قول بوساڭسىپ، ەشقانداي قيمىل جاساماي تۇرعاندا ەرىكسىز دىرىلدەۋى. ادامنان قولدارىن تىزەسىنە نەمەسە باسقا بەتكە قويىپ، جاي عانا بوساڭسۋدى سۇراۋعا بولادى. پاركينسون اۋرۋىندا ترەمور كوبىنەسە ءدال تىنىشتىق كۇيىندە پايدا بولادى جانە ەرتە كەزەڭدەردە ءجيى دەنەسىنىڭ ءبىر جاعىنان باستالادى.
الايدا مۇنداي تەست ماماننىڭ تەكسەرۋىن الماستىرا المايدى: تۇپكىلىكتى دياگنوز سيمپتومداردىڭ جيىنتىعى مەن تەكسەرۋ ناتيجەلەرى بويىنشا قويىلادى. سوندىقتان ادام وسى بەلگىلەردىڭ قايسىسىن بايقاسا دا، بۇل نەۆرولوگقا قارالۋعا سەبەپ.
بۇعان دەيىن نەۆرولوگ ەۆگەنيا باحتىباەۆا Kursiv Health-كە ءدارىحاناداعى تىنىشتاندىرعىش دارىلەردىڭ نەگە مازاسىزدىقتى ەمدەمەيتىنىن ايتقان بولاتىن.