ارمەنيا پرەمەر-مينيسترى نيكول پاشينيان ەلدىڭ ەۋرازيالىق ەكونوميكالىق وداق (ەاەو) پەن ەۋروپالىق وداق (ەو) اراسىنداعى تاڭداۋمەن شەكتەلمەۋى كەرەكتىگىن، ءۇشىنشى بالامانىڭ پايدا بولۋى مۇمكىن ەكەنىن ايتتى، دەپ حابارلايدى infohub.kz سايتى.
News.am-نىڭ حابارلاۋىنشا، بريفينگتە پاشينيان ەاەو مەن ەو ارمەنيا ءۇشىن بىردەي ماڭىزدى ەكەنىن، بيلىك ناقتى بالامالاردى ۇسىنبايىنشا جانە ازاماتتار سانالى تاڭداۋ جاساي المايىنشا، بۇل ەكى ۇيىمنىڭ ماڭىزى زور ەكەنىن اتاپ ءوتتى. ونىڭ ايتۋىنشا، ارميان قوعامى تەك وسى ەكى ينتەگراسيالىق بلوكتىڭ اراسىندا تاڭداۋ جاساۋمەن شەكتەلمەۋى ءتيىس.
«حالىق تاڭداۋ جاساۋ مۇمكىندىگىنە يە بولۋى كەرەك، ءبىراق ەاەو-عا دا، ەو-عا دا قاتىسى جوق ءۇشىنشى باستامانىڭ پايدا بولۋى ابدەن مۇمكىن، ويتكەنى ءبىز مىندەتتى تۇردە ءبىر جەرگە كىرۋىمىز كەرەك دەپ ەشكىم ايتقان جوق»، — دەدى ارمەنيا پرەمەر-مينيسترى.
تاسس-تىڭ جازۋىنشا، پاشينيان ەو-عا مۇشەلىك ماسەلەسى بويىنشا رەفەرەندۋم دايىندىق جۇمىستارى جۇرگىزىلىپ، بىرلەستىككە كىرۋگە رەسمي ءوتىنىم بەرىلگەننەن كەيىن عانا ۇيىمداستىرىلاتىنىن دا مالىمدەدى. «ءبىز وسى ەكى نۇسقانى اتايمىز، ءبىراق تاعى ءبىر باستاما بولۋى مۇمكىن: ەاەو دا، ەو دا ەمەس. ءۇشىنشى نۇسقا دا بولۋى مۇمكىن. ءبىز ارمەنيا ازاماتتارىنا بالامالار جاساعىمىز كەلەدى، حالىق ءوزى تاڭداسىن، ءبىراق بۇگىن ءبىز ءتورتىنشى بالاما، بەسىنشى بالاما تۋرالى ويلاۋدى توقتاتپايمىز، ويتكەنى ارمەنيا ەشكىمگە كەرەك ەمەس، ونىڭ بارار جەرى جوق دەپ ەشكىم ايتپاۋى كەرەك»، — دەپ قوستى پاشينيان.
بۇعان دەيىن نيكول پاشينيان ەلدىڭ ەاەو مەن ەو-عا ءبىر مەزگىلدە مۇشە بولۋى مۇمكىن ەمەس ەكەنىن ايتقان بولاتىن.