قازاقستاندىقتاردى ارمەنيا پرەمەر-مينيسترى نيكول پاشينيانعا تەلىنگەن جالعان دايەكسوزدىڭ تارالۋى تۋرالى ەسكەرتتى، دەپ حابارلايدى infohub.kz سايتى.
سك جانىنداعى دەزينفورماسيامەن كۇرەس ورتالىعىنىڭ مالىمەتىنشە، الەۋمەتتىك جەلىلەردە ارمەنيا پرەمەر-مينيسترى نيكول پاشينياننىڭ قازاقستانعا قاتىستى ايتقان دەلىنگەن جالعان اقپارات تارالۋدا.
جۇرگىزىلگەن تەكسەرۋ دايەكسوزدىڭ قولدان جاسالعانىن كورسەتتى. نيكول پاشينيان مۇنداي سوزدەر ايتپاعان. مانيپۋلياسياعا نەگىز بولعان — ارمەنيا ۇكىمەت باسشىسىنىڭ 3 قىركۇيەكتەگى بريفينگتە ءجۋرناليستىڭ سۇراعىنا بەرگەن جاۋابى. ەرەۆان شەشىمدەرىنە سىرتقى ىقپال تۋرالى بولجامدى تۇسىندىرە وتىرىپ، نيكول پاشينيان: "الدارىڭىزدا ارمەنيا كسر كومپارتياسى ورتالىق كوميتەتىنىڭ ءبىرىنشى حاتشىسى تۇرعانداي اسەر قالىپتاسىپ وتىر"، — دەگەن ەدى. وسىلايشا، ءسوز تەك ارمەنيانىڭ مەملەكەتتىك شەشىمدەر قابىلداۋداعى تاۋەلسىزدىگى تۋرالى بولدى. بۇل كونتەكستە قازاقستان اتالماعان.
جالعان اقپارات اۆتورلارى جەكەلەگەن سوزدەردى وزگەرتىپ، جاۋاپتى ءتۇپنۇسقادا جوق تىركەستەرمەن تولىقتىرعانى اتاپ وتىلەدى. ناتيجەسىندە مالىمدەمە باسقا ماعىناعا يە بولىپ، قازاقستانعا قارسى شابۋىل رەتىندە ۇسىنىلعان. ءتۇپنۇسقا جاۋاپتىڭ مازمۇنى بريفينگتىڭ جاريالانعان بەينەجازباسىمەن راستالادى. تولىق جاۋاپ VERELQ باسىلىمىندا كەلتىرىلگەن.
مۇنداي مانيپۋلياسيالار قازاقستان مەن ارمەنيا حالىقتارى اراسىندا جاعىمسىز كوڭىل-كۇي قالىپتاستىرۋعا جانە جاساندى شيەلەنىس تۋدىرۋعا باعىتتالعان، دەپ قوستى دەزينفورماسيامەن كۇرەس ورتالىعىندا.
قازاقستاندىقتاردى تەكسەرىلمەگەن دايەكسوزدەر مەن جاريالانىمداردى تاراتپاۋعا، العاشقى دەرەككوزگە، كۇنى مەن مالىمدەمە كونتەكستىنە نازار اۋدارۋعا شاقىردى. ازاماتتارعا جالعان اقپارات تاراتقانى ءۇشىن 250 اەك-كە (1 081 250 تەڭگە) دەيىن ايىپپۇل نەمەسە اكىمشىلىك قاماققا الۋ تۇرىندەگى اكىمشىلىك جاۋاپكەرشىلىك قاراستىرىلعانىن ەسكە سالدى. سونىمەن قاتار، قوعامدىق ءتارتىپتىڭ بۇزىلۋ ءقاۋپىن تۋدىراتىن نەمەسە زاڭمەن قورعالاتىن قۇقىقتار مەن مۇددەلەرگە ەلەۋلى زيان كەلتىرەتىن كورىنەۋ جالعان اقپاراتتى تاراتۋ 7 جىلعا دەيىن باس بوستاندىعىنان ايىرۋعا اكەپ سوعۋى مۇمكىن.