الماتى – استانا باعىتىنداعى رەيستىڭ جولاۋشىسى FlyArystan اۋەكومپانياسىنىڭ ەرەجەلەرىنە نارازىلىعىن الەۋمەتتىك جەلىدە ءبىلدىردى. ونىڭ ايتۋىنشا، ۇشۋ ەكى ساعاتقا كەشىكتىرىلگەن. بۇل وقيعا جولاۋشىلاردىڭ ءبىرىنىڭ قول جۇگىنىڭ نورمادان اسىپ كەتۋىنە بايلانىستى بولعان، دەپ حابارلايدى infohub.kz.
Threads الەۋمەتتىك جەلىسىندە elmara_duisenbayeva اتتى قولدانۋشى FlyArystan رەيسىنىڭ ەكى ساعاتقا كەشىكتىرىلگەنىن، سەبەبى جولاۋشىلاردىڭ ءبىرىنىڭ قول جۇگىندە پروبلەما بولعانىن جازدى. ونىڭ سوزىنشە، سالماق 400 گراممعا ارتىق بولعاندىقتان، 200-دەن استام ادام وتىرعان ۇشاقتى بورتىندا 50 مينۋتتاي ۇستاعان، ال رەيستىڭ ءوزى ەكى ساعاتقا كەشىكتىرىلگەن. جولاۋشى ارتىق سالماق ءۇشىن 11 مىڭ تەڭگە ايىپپۇل تولەگەن، ءبىراق سودان كەيىن بارلىعىن ءتۇسىرىپ، قايتادان تەكسەرۋدەن وتكىزگەن. 00:50-دە ۇشۋ 01:30-عا اۋىستىرىلعانى حابارلانعان، الايدا قايتا تەكسەرۋ سول ۋاقىتتا باستالماعان. اۆتور اۋەكومپانيادان SMS العانىن، وندا تاسىمالداۋشى جاۋاپكەرشىلىكتى وزىنەن الىپ تاستايتىنىن ايتقان.
پوست استىنداعى پىكىرلەردە FlyArystan ءباسپاسوز قىزمەتى جاعدايدى ءتۇسىندىردى. 24 تامىزدا FS7063 رەيسى الماتى – استانا باعىتىندا ۇشۋ الدىندا جولاۋشى بەلگىلەنگەن تاسىمالداۋ ەرەجەلەرىن بۇزىپ، تارتىپسىزدىك كورسەتكەن. اۋە كەمەسىنىڭ كومانديرى ۇشۋ قاۋىپسىزدىگىن قامتاماسىز ەتۋ ءۇشىن بۇل جولاۋشىنى تاسىمالداۋدان باس تارتۋ تۋرالى شەشىم قابىلداعان. جولاۋشىنى رەيستەن شىعارۋعا بايلانىستى اۆياسيالىق قاۋىپسىزدىك تالاپتارىنا سايكەس بارلىق جولاۋشىلار ءتۇسىرىلىپ، اۋە كەمەسىنە قايتادان الدىن الا تەكسەرۋ جۇرگىزىلگەن. قاجەتتى پروسەدۋرالار اياقتالعاننان كەيىن جولاۋشىلار قايتادان وتىرعىزىلعان. ناتيجەسىندە ۇشۋ 1 ساعات 52 مينۋتقا كەشىكتىرىلگەن.
FlyArystan جولاۋشىلاردان ءماجبۇرلى كۇتۋ مەن كەشىكتىرۋگە بايلانىستى قولايسىزدىقتار ءۇشىن كەشىرىم سۇراپ، بۇل شارالاردىڭ ۇشۋ قاۋىپسىزدىگىن قامتاماسىز ەتۋ ءۇشىن مىندەتتى ەكەنىن اتاپ ءوتتى.