رەسەيلىك ادۆوكات ۆلاديمير جەرەبەنكوۆ Telegram نەگىزىن قالاۋشى پاۆەل دۋروۆتىڭ كىناسى دالەلدەنسە، ونى ءومىر بويىنا باس بوستاندىعىنان ايىرۋ جازاسىنا كەسۋى مۇمكىن ەكەنىن مالىمدەدى. بۇل تۋرالى infohub.kz سايتى حابارلايدى.
ادۆوكات ۆلاديمير جەرەبەنكوۆ تاسس-قا بەرگەن سۇحباتىندا تەرروريستىك ارەكەتكە جاردەمدەسۋ بابى بويىنشا ەڭ اۋىر جازا – ءومىر بويىنا باس بوستاندىعىنان ايىرۋ ەكەنىن اتاپ ءوتتى. سونداي-اق، تەرگەۋ بارىسىندا دۋروۆقا رەسەي قىلمىستىق كودەكسىنىڭ باسقا باپتارى بويىنشا دا ايىپ تاعىلۋى مۇمكىن.
زاڭگەردىڭ ايتۋىنشا، دۋروۆتى رەسەي اۋماعىندا سىرتتاي قاماۋعا الۋى مۇمكىن. مۇنداي ءراسىم ەكستراديسيا ءۇشىن قاجەت: رەسەيلىك سوت كۇدىكتىنى سىرتتاي قاماۋعا الادى، سودان كەيىن قۇقىق قورعاۋ ورگاندارى، ونىڭ ىشىندە ينتەرپول ارقىلى ونى بەرۋدى تالاپ ەتەدى.
ەسكە سالا كەتەيىك، بۇگىن، 2026 جىلعى 29 شىلدەدە، Telegram نەگىزىن قالاۋشىعا تەرروريزمگە جاردەمدەسۋ بابى بويىنشا ايىپ تاعىلعانى بەلگىلى بولدى. ءساۋىر ايىندا دۋروۆ شامامەن 20 جىل بۇرىن تۇرعان رەسەيدەن شاقىرتۋ قاعازىن العانىن حابارلاعان ەدى. 24 اقپاندا رەسەيلىك باق-تا دۋروۆقا قاتىستى تەرروريستىك ارەكەتكە جاردەمدەسۋ كۇدىگىمەن قىلمىستىق ءىس قوزعالعانى تۋرالى اقپارات پايدا بولدى.
كەيىن رەسەي پرەزيدەنتىنىڭ ءباسپاسوز حاتشىسى دميتري پەسكوۆ قۇقىق قورعاۋ ورگاندارى قاجەت دەپ سانايتىن شارالاردى قولدانىپ جاتقانىن جانە Telegram اكىمشىلىگى ەل بيلىگىمەن ىنتىماقتاسپايتىنىن مالىمدەدى. دۋروۆتىڭ ءوزى ءىستىڭ قوزعالۋىنا تۇسىنىكتەمە بەرىپ، بيلىك كۇن سايىن رەسەيلىكتەردىڭ Telegram-عا كىرۋىن شەكتەۋ ءۇشىن جاڭا سىلتاۋلار ويلاپ تاۋىپ، جەكە ومىرگە قولسۇقپاۋشىلىق جانە ءسوز بوستاندىعى قۇقىعىن باسۋعا تىرىسىپ جاتقانىن ايتتى.