Telegram مەسسەندجەرىنىڭ نەگىزىن قالاۋشى پاۆەل دۋروۆ رەسەيدە تەرروريزمگە جاردەمدەستى دەپ ايىپتالدى. بۇل تۋرالى infohub.kz حابارلايدى.
رەسەي فەدەرالدىق قاۋىپسىزدىك قىزمەتىنىڭ (فسب) مالىمەتىنشە، مەسسەندجەردى ۋكراينانىڭ ارنايى قىزمەتتەرى رەسەي اۋماعىندا ديۆەرسيا جانە تەررور اكتىلەرىن دايىنداۋ مەن ۇيلەستىرۋ ءۇشىن پايدالانعان. سونىمەن قاتار، Telegram ۋكرايندىقتار پايدالانعان ارنالاردى، چاتتار مەن بوتتاردى جويماعان.
دۋروۆقا حالىقارالىق تۇتقىنداۋ وردەرى شىعارىلدى. ول رەسەيدە تۋعان، ءبىراق شەتەلدە تۇراتىن كاسىپكەر. ايىپ تاعىلعاننان كەيىن Telegram-نىڭ X-تەگى پاراقشاسى دۋروۆتىڭ ورتاڭعى ساۋساعىن كورسەتىپ تۇرعان سۋرەتىن جاريالادى.
بۇعان دەيىن دۋروۆ رەسەي بيلىگىن «ورىستاردىڭ Telegram-عا كىرۋىن شەكتەۋ ءۇشىن جاڭا سىلتاۋلار ويلاپ تابۋدا» دەپ ايىپتاعان.
Telegram رەسەيدەگى تانىمال مەسسەندجەر، ونى ونداعان ميلليون ادام قولدانادى. الايدا بيلىك ينتەرنەت بوستاندىعىن شەكتەۋ اياسىندا وعان كىرۋدى شەكتەپ كەلەدى.
دۋروۆ كوپ جىلدان بەرى رەسەيدەن تىس جەردە تۇرادى جانە فرانسيا مەن بىرىككەن اراب امىرلىكتەرىنىڭ (ءباا) ازاماتتىعىنا يە. باسقا ەلدەردىڭ ونىڭ تۇتقىندالۋى تۋرالى وردەردى ورىندايتىنى بەلگىسىز.