پاۆلوداردا سوت اليمەنت مولشەرىن اكەسىنىڭ ناقتى تابىسىنا قاراپ ۇلعايتتى. ەر ادام رەسمي تۇردە 85 مىڭ تەڭگە جالاقى بەلگىلەگەنىمەن، ءبىر جىلدا 16 ميلليون تەڭگە تاپقانى انىقتالدى، دەپ حابارلايدى infohub.kz سايتى.
پاۆلودار وبلىسى سوتتارىنىڭ رەسمي Telegram-ارناسىندا حابارلانعانداي، كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوت ايەلدىڭ ەر ادامعا مەدياسيا تارتىبىندەگى داۋدى رەتتەۋ تۋرالى كەلىسىمدى بۇزۋ جانە اليمەنتتى بەلگىلەنگەن اقشالاي سومادا ءوندىرۋ تۋرالى تالاپ ارىزى بويىنشا ازاماتتىق ءىستى قارادى.
تاراپتاردىڭ كامەلەتكە تولماعان قىزى بار. بۇعان دەيىن جاۋاپكەردەن بالانى اسىراۋعا اليمەنت تابىسىنىڭ 1/4 بولىگى جانە (نەمەسە) وزگە دە كىرىسى مولشەرىندە ءوندىرىلىپ كەلگەن. 2023 جىلدىڭ جەلتوقسانىندا تاراپتار اراسىندا ءدال وسىنداي مولشەردە اليمەنت تولەۋ تۋرالى مەدياتيۆتىك كەلىسىم دە جاسالعان.
سوتقا جۇگىنگەن تالاپكەر تولەنىپ جاتقان اليمەنت سوماسى بالانى اسىراۋعا جۇمسالاتىن شىعىنداردى وتەمەيتىنىن كورسەتكەن. سونىمەن قاتار، جاۋاپكەر كاسىپكەرلىك قىزمەتپەن اينالىسادى، الايدا رەسمي تۇردە وزىنە 85 مىڭ تەڭگە جالاقى بەلگىلەگەن.
سوت وتىرىسى بارىسىندا جاۋاپكەردىڭ جەكە كاسىپكەر رەتىندە تىركەلگەنى انىقتالدى. سالىق ەسەپتىلىگىنە سايكەس، ونىڭ 2025 جىلعى كاسىپكەرلىك قىزمەتىنەن تۇسكەن تابىسى 16 ميلليون تەڭگەدەن اسقان. سونىمەن قاتار، بانكتىك شوتتار بويىنشا اقشا قوزعالىسى رەسمي جالاقى مولشەرىنەن ايتارلىقتاي اسىپ تۇسكەن.
سوت تولەنىپ جاتقان اليمەنت مولشەرى جاۋاپكەردىڭ العان تابىسىنا سايكەس كەلمەيدى، وسىعان بايلانىستى بالانىڭ اتا-اناسىنان لايىقتى اسىراۋ الۋ قۇقىعى بۇزىلادى دەگەن قورىتىندىعا كەلدى. سونداي-اق، جاۋاپكەردىڭ كورسەتىلەتىن قىزمەت كولەمىنە بايلانىستى وزگەرمەلى تابىسى بار ەكەنى انىقتالدى.
اليمەنت مولشەرىن انىقتاۋ كەزىندە سوت ەڭ الدىمەن بالا مۇددەسىنىڭ بارىنشا قامتاماسىز ەتىلۋىن باسشىلىققا الدى. اليمەنتتى تەك رەسمي جالاقىعا ۇلەستىك قاتىناستا بەلگىلەۋ بالانى اسىراۋ دەڭگەيىن ايتارلىقتاي ناشارلاتۋى مۇمكىن ەدى.
ناتيجەسىندە سوت مەدياسيا تارتىبىندەگى داۋدى رەتتەۋ تۋرالى كەلىسىمدى بۇزىپ، جاۋاپكەردەن كامەلەتكە تولماعان بالانى اسىراۋعا اليمەنتتى بەلگىلەنگەن اقشالاي سومادا — اي سايىن 20 اەك (2026 جىلى 86 500 تەڭگە) بالا كامەلەتكە تولعانعا دەيىن ءوندىردى. تالاپتىڭ قالعان بولىگى قاناعاتتاندىرىلمادى. شەشىم زاڭدى كۇشىنە ەندى.