پاۆلودار اۋەجايى ۇشۋ-قونۋ جولاعىن قايتا قۇرۋ اياقتالعان سوڭ شتاتتىق رەجيمگە ورالدى. جوندەۋدەن كەيىنگى العاشقى رەيس استانا – پاۆلودار – استانا باعىتى بويىنشا ورىندالدى، دەپ حابارلايدى infohub.kz سايتى.
قايتا قۇرۋ بارىسىندا ۇشۋ-قونۋ جولاعى جاڭارتىلىپ قانا قويماي، ەنى 45 مەتردەن 60 مەترگە دەيىن كەڭەيتىلدى. بۇل اۋەجايعا زاماناۋي اۋە كەمەلەرىن قابىلداۋعا جانە ۇشۋ قاۋىپسىزدىگىن ارتتىرۋعا مۇمكىندىك بەرەدى.
ءقازىر استانا – پاۆلودار – استانا باعىتى بويىنشا سۋبسيديالاناتىن رەيستەر ىسكە قوسىلدى. ولاردى اپتاسىنا ءتورت رەت Vietjet Qazaqstan اۋەكومپانياسى ورىندايدى. «ءبىر باعىتتاعى بيلەت قۇنى 15 مىڭ تەڭگەنى قۇرايدى»، — دەپ ناقتىلادى ۆەدومستۆودا. بۇل باعىتقا بيلەت ساتۋ تامىز ايىنىڭ ءبىرىنشى جارتىسىندا باستالدى.
1 قىركۇيەكتەن باستاپ كوممەرسيالىق رەيستەردى قايتا جانداندىرۋ جوسپارلانۋدا. FlyArystan پاۆلودار – الماتى – پاۆلودار باعىتى بويىنشا كۇن سايىن ۇشادى. سول كۇنى «سيبير» اۋەكومپانياسى پاۆلوداردان نوۆوسيبيرسكىگە حالىقارالىق رەيستەردى ىسكە قوسۋدى جوسپارلاپ وتىر. ۇشۋلار اپتاسىنا جەتى رەت ورىندالادى.
ەسكە سالايىق، پاۆلودار اۋەجايى 2025 جىلدىڭ 1 ساۋىرىندە قايتا قۇرۋعا جابىلعان بولاتىن. وسى كەزەڭنەن باستاپ بارلىق رەيستەر توقتاتىلعان ەدى.
بۇعان دەيىن «كۋرسيۆ» ارقالىق اۋەجايى قۇرىلىستى جانە سەرتيفيكاتتاۋدىڭ بارلىق قاجەتتى راسىمدەرىن اياقتاعانىن جازعان بولاتىن. العاشقى رەيستى 22 تامىزدا قابىلداۋ جوسپارلانۋدا.