پاۆلوداردا قۇقىق قورعاۋ ورگاندارىنىڭ قىزمەتكەرلەرى دەنە جاراقاتىن سالۋ قاۋپىمەن اقشا بوپسالاعان التى كۇدىكتىنى ۇستادى. جابىرلەنۋشىلەرگە كەلتىرىلگەن جالپى شىعىن 3 ملن تەڭگەدەن استى، دەپ حابارلايدى infohub.kz سايتى.
پاۆلودار وبلىسى پوليسيا دەپارتامەنتىنىڭ ءباسپاسوز قىزمەتى ءمالىم ەتكەندەي، ۇيىمداسقان قىلمىسقا قارسى كۇرەس باسقارماسىنىڭ جەدەل قىزمەتكەرلەرى بىرنەشە بوپسالاۋ وقيعاسىنا قاتىسى بار دەگەن كۇدىكتىلەر توبىنىڭ ارەكەتىن توقتاتتى.
سوتقا دەيىنگى تەرگەۋ اياسىندا ءۇش جابىرلەنۋشى انىقتالدى. الدىن الا دەرەكتەر بويىنشا، ولارعا كەلتىرىلگەن ماتەريالدىق شىعىننىڭ جالپى مولشەرى 3 ملن تەڭگەدەن اسادى.
«كۇدىكتىلەر ءبىر اي بويى پاۆلودار تۇرعىندارىنان اقشا تالاپ ەتىپ، تالاپتارىن دەنە جاراقاتىن سالۋ قاۋپىمەن ۇشتاستىرىپ وتىرعانى انىقتالدى»، — دەدى پاۆلودار وبلىسى پوليسيا دەپارتامەنتىندە.
جۇرگىزىلگەن ءىس-شارالاردىڭ ناتيجەسىندە جەدەل قىزمەتكەرلەر التى كۇدىكتىنىڭ جەكە باسىن انىقتاپ، ۇستادى. ولاردىڭ بەسەۋى ۋاقىتشا ۇستاۋ يزولياتورىنا قامالدى.
«بوپسالاۋ فاكتىلەرى بويىنشا قىلمىستىق ىستەر قوزعالدى. قازىرگى تاڭدا قاجەتتى تەرگەۋ ارەكەتتەرى جۇرگىزىلىپ، بولعان وقيعانىڭ بارلىق ءمان-جايى انىقتالۋدا. سونداي-اق ۇستالعانداردىڭ باسقا دا وسىعان ۇقساس قىلمىستارعا قاتىسى بار-جوعى تەكسەرىلۋدە»، — دەپ حابارلادى پاۆلودار وبلىسى پوليسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ باستىعى عابيت قابدراحمانوۆ.
سونىمەن قاتار ءتارتىپ ساقشىلارى جەدەل بەينەجازبانى كورسەتتى. «پوليسيا، جات!» — دەپ بۇيىرادى ارنايى جاساق ساربازدارى ۇستاۋ كەزىندە.