پاۆلودار وبلىسىندا «Aqtogai Milk» ج ش س اۋماعىنداعى كارىز قۇدىعىندا التى ادامنىڭ قازا بولۋىنا بايلانىستى ءۇش كۇدىكتى ۇستالدى. قازا تاپقانداردىڭ اراسىندا كامەلەتكە تولماعان بالا بار، تاعى ءبىر ادام اۋرۋحاناعا جات قىزىلدى، دەپ حابارلايدى infohub.kz سايتى.
بۇعان دەيىن كەيبىر باق-تا پاۆلودار وبلىستىق ءماسليحاتىنىڭ دەپۋتاتى، Aqtogai Milk فەرماسىنا قاتىسى بار كاسىپكەر الەكساندر تەرەنتەۆتىڭ ۇستالۋى مۇمكىن ەكەندىگى تۋرالى اقپارات تاراعان ەدى. الايدا پاۆلودار وبلىسى پوليسيا دەپارتامەنتىندە بۇل دەرەكتى تەرگەۋ قۇپياسىن العا تارتىپ، راستامادى.
پوليسيادا سوتقا دەيىنگى تەرگەۋ امالدارى جۇرگىزىلىپ جاتقانىن حابارلادى. «قىلمىستىق ءىس اياسىندا بارلىق ءمان-جايدى انىقتاۋعا باعىتتالعان قاجەتتى تەرگەۋ شارالارى كەشەنى جۇرگىزىلۋدە. قازىرگى ۋاقىتتا ءۇش كۇدىكتى ۇستالىپ، ۋاقىتشا ۇستاۋ يزولياتورىنا قامالدى»، — دەپ مالىمدەدى دپ-دا.
ۇستالعانداردىڭ جەكە باسى جاريالانبايدى، تەرگەۋدىڭ باسقا دا مالىمەتتەرى قازاقستان رەسپۋبليكاسى قىلمىستىق پروسەستىك كودەكسىنىڭ 201-بابىنا سايكەس جاريا ەتىلمەيدى.
ەسكە سالايىق، قايعىلى وقيعا جولامان اۋىلىندا بولدى. وندا «Aqtogai Milk» ج ش س ءسۇت فەرماسىنىڭ اۋماعىنداعى كارىز قۇدىعىندا جۇمىس كەزىندە التى ادام قازا تاپتى. الدىن الا دەرەكتەر بويىنشا، جۇمىسشىلار ەلەكتر سورعىسىنداعى اقاۋدى جويۋمەن اينالىسقان. تاعى ءبىر ادام زارداپ شەگىپ، اۋىر جاعدايدا اۋرۋحاناعا جەتكىزىلدى.
الەكساندر تەرەنتيەۆ قازا تاپقانداردىڭ وتباسىلارىنا كوڭىل ايتىپ، كاسىپورىن ولارعا قاجەتتى كومەك كورسەتەتىنىن ۋادە ەتتى.