20 شىلدەدە پاۆلودار وبلىسىنداعى Aqtogai Milk ءسۇت فەرماسىندا قايعىلى وقيعا بولدى: كارىز قۇدىعىندا گازبەن ۋلانىپ، التى ادام قازا تاپتى. قۇربانداردىڭ اراسىندا كامەلەتكە تولماعان بالا دا بار، دەپ حابارلايدى infohub.kz سايتى.
قازا تاپقان جۇمىسشىلاردىڭ وتباسىلارى ماتەريالدىق قولداۋ الادى. Aqtogai Milk كومپانياسى ولارعا جىل سوڭىنا دەيىن جالاقى تولەۋگە، نەسيەلەرىن وتەۋگە كومەكتەسۋگە، سونداي-اق قازا تاپقانداردىڭ كامەلەتكە تولماعان بالالارىن 18 جاسقا تولعانعا دەيىن اسىراپ، ءبىلىم بەرۋدى ءوز موينىنا الۋعا مىندەتتەندى. بۇدان باسقا، مەملەكەتتىك ورگاندار دا قولداۋ كورسەتەدى.
وقيعا كارىز قۇدىعىندا ەلەكتر سورعىسىن جوندەۋ كەزىندە بولعان. گازبەن ۋلانۋ سالدارىنان 1963، 1975، 1983، 1998، 2006 جانە 2009 جىلى تۋعان التى ەر ادام وقيعا ورنىندا قازا تاپتى. وسىلايشا، ەڭ كىشىسىنە 16-17 جاس بولعان. تاعى ءبىر زارداپ شەككەن كومىرقىشقىل گازىنان ورتاشا اۋىرلىقتاعى ۋلانۋمەن اقتوعاي اۋداندىق اۋرۋحاناسىنا جات قىزىلدى.
Aqtogai Milk فەرماسى، اشىق دەرەككوزدەردىڭ مالىمەتىنشە، پاۆلودار وبلىستىق ءماسليحاتىنىڭ دەپۋتاتى الەكساندر تەرەنتەۆكە تيەسىلى. ول كوڭىل ايتىپ، كاسىپورىن وتباسىلارعا كومەك كورسەتەتىنىن راستادى.
وقيعا بويىنشا پوليسيا قىلمىستىق ءىس قوزعادى.