پاۆلودار ماڭىندا جەرگىلىكتى بالىقشى كۇتپەگەن جەردەن ەجەلگى قورىمدى تاۋىپ الدى. وندا ادام قاڭقاسى مەن قىش ىدىستار بولعان. ارحەولوگتار مۇنىڭ جاسىن شامامەن 4 مىڭ جىل دەپ انىقتاپ، جەرلەنگەن ادام كەن ءوندىرۋ جانە وڭدەۋمەن اينالىسقان شەبەر بولعان دەپ ەسەپتەيدى، دەپ حابارلايدى infohub.kz سايتى.
بۇل تابىلىم عالىمداردىڭ ۇلكەن قىزىعۋشىلىعىن تۋدىردى. ارحەولوگيالىق زەرتتەۋلەر ينستيتۋتىنىڭ قىزمەتكەرلەرى قورعاۋ-قۇتقارۋ قازبا جۇمىستارىن جۇرگىزدى. قورىمنان ەرتە قولا ءداۋىرىنىڭ ەڭبەك قۇرالدارى: كۆارسيت كەتپەندەر مەن جىلتىراتىلعان تاس بالتا تابىلدى.
ارحەولوگتاردىڭ ايتۋىنشا، ەجەلگى ۋاقىتتا قايتىس بولعان ادامنىڭ قاسىنا ونىڭ كاسىبىنە بايلانىستى زاتتار قويىلعان. بۇل تابىلىمدار جەرلەنگەن ادامنىڭ كەن ءوندىرۋ جانە وڭدەۋمەن اينالىسقانىن كورسەتەدى.
«ءبىز كەتپەندەردى كورىپ وتىرمىز – ولار ءبىر نارسەنى قازۋعا ارنالعان، ۇساقتاۋ قۇرالىن كورىپ وتىرمىز – مىسالى، كەندى ۇساقتاۋ ءۇشىن، جانە جىلتىراتىلعان تاس بالتانى كورىپ وتىرمىز. بۇل ادامنىڭ مەتالدى قۇيۋ جانە وڭدەۋمەن تىكەلەي اينالىسقانىن كورسەتەدى»، – دەيدى ارحەولوگيالىق قورلاردىڭ باس ساقتاۋشىسى ەلەنا تۋشەۆا.
ارحەولوگتاردىڭ سوزىنە قاراعاندا، بۇل جەرلەۋ ەرتىس وڭىرىندە مەتاللۋرگيا ءوندىرىسىنىڭ پايدا بولۋ كەزەڭىنە جاتادى.
بۇعان دەيىن احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىنىڭ عالىمدارى اۋليەكول اۋدانىنان نەوليت داۋىرىنە (ب.ز.د. VII–V مىڭجىلدىق) جاتاتىن ءۇش جەرلەۋ ورنىن تاپقانى حابارلانعان بولاتىن.