پاۆلوداردا بۇرىن رەنوۆاسيا جۇرگىزىلگەن لەرمونتوۆ كوشەسىندەگى بارلىق كوپپاتەرلى ۇيلەردىڭ قاسبەتىن جاڭارتۋعا شەشىم قابىلداندى. قالالىق اكىمدىكتىڭ ايتۋىنشا، بۇل كوشەگە ءبىرتۇتاس ساۋلەت كەلبەتىن بەرۋگە مۇمكىندىك بەرەدى، دەپ حابارلايدى infohub.kz سايتى.
لەرمونتوۆ كوشەسىندەگى رەنوۆاسيا ەكى جىلعا سوزىلدى. وسى ۋاقىت ىشىندە اۋماق تولىعىمەن جاڭارتىلىپ، زاماناۋي كورىككە يە بولدى: سۋارۋ جۇيەسى، جاڭا تروتۋارلار مەن ۆەلوسيپەد جولدارى سالىندى، دەمالىس الاڭدارى، ارت-نىساندار مەن شاعىن ساۋلەت نىساندارى، بالالار الاڭدارى جانە سۋبۇرقاق ورناتىلدى.
بيىل پاۆلودار وبلىسى اكىمى اساين بايحانوۆتىڭ تاپسىرماسىمەن كوپقاباتتى ۇيلەردىڭ قاسبەتتەرىن جاڭارتۋ تۋرالى شەشىم قابىلداندى. لەرمونتوۆ كوشەسىنىڭ بويىندا بارلىعى 20 ءۇي ورنالاسقان، ولاردىڭ ءارقايسىسىندا بوياۋدان باس تارتىپ، زاماناۋي قاپتاما ماتەريالدارىن قولدانۋعا كوشتى.
«قالاداعى بارلىق نەگىزگى جولداردى رەتكە كەلتىردىك. اياق باسار جەردە دەمالىس ورىندارىن جاساپ جاتىرمىز. ەندى پاۆلوداردىڭ سىرتقى كەلبەتىمەن، ەڭ الدىمەن ەسكى تۇرعىن ءۇي قورىمەن اينالىسۋ قاجەت. ءبىز قاسبەتتەردى ادەتتەگىدەي بوياۋدان بىرتىندەپ باس تارتىپ كەلەمىز. زاماناۋي قاپتاما ماتەريالدارى ۇزاققا شىدايدى جانە قالانىڭ ءبىرتۇتاس ساۋلەت كەلبەتىن قالىپتاستىرۋعا مۇمكىندىك بەرەدى»، — دەدى پاۆلودار وبلىسىنىڭ اكىمى اساين بايحانوۆ.
كوپقاباتتى ۇيلەردى جاڭارتۋ لەرمونتوۆ كوشەسىنە ءبىرتۇتاس ساۋلەت كەلبەتىن بەرۋگە مۇمكىندىك بەرەدى. سونىمەن قاتار، جۇمىستا فورمالدى كوزقاراس قولدانىلمايدى: قاسبەتتەر تەك ورتالىق جاعىنان عانا ەمەس، اۋلالار جاعىنان دا قاپتالادى.
«مەن اقپاراتتىق تەحنولوگيالار كوللەدجىنىڭ ستۋدەنتىمىن. لەرمونتوۆ كوشەسى شىنىمەن دە الدەقايدا جاقساردى، بىلتىر كوشە اباتتاندىرىلدى، بيىل قاسبەتتەردى جاڭارتۋ باستالدى. ساباقتان كەيىن دوستارىممەن سەرۋەندەيمىز. بارلىق جاعداي جاسالعان. ساۋلەت كەلبەتى ءبىزدىڭ مەگاپوليستەرىمىز — استانا، الماتىدان كەم ەمەس»، — دەيدى 3-كۋرس ستۋدەنتى دانيال شامپاتوۆ.
«وسى كوشەدە بالا كۇنىمنەن تۇرامىن. ونىڭ جاڭارىپ جاتقانىن كورۋ جاعىمدى. قاسبەت ءقازىر وتە ادەمى جانە ۇقىپتى كورىنەدى، بۇكىل كوشەنىڭ كەلبەتى بىردەن وزگەرەدى. مۇنداي جۇمىستاردىڭ جۇرگىزىلگەنى جاقسى، قالانىڭ باسقا دا كوشەلەرىندە قاسبەتتەردىڭ جاڭارتىلعانىن كورگىم كەلەدى»، — دەدى تاعى ءبىر پاۆلودارلىق ولجاس ايتبايەۆ.
ايتا كەتۋ كەرەك، مەردىگەر جۇمىستى ايتارلىقتاي جىلدام مەرزىمدە جۇرگىزۋدە. مونتاج كۇردەلى قۇرىلىس-مونتاج شەشىمدەرىن قاجەت ەتپەيدى، قىركۇيەك ايىنىڭ سوڭىنا دەيىن تولىق اياقتاۋ جوسپارلانۋدا. سونىمەن قاتار، وسىنداي ءتاسىلدى پاۆلوداردىڭ باسقا دا ماگيسترالدىق كوشەلەرىندە قولدانۋ جوسپارلانىپ وتىر.