پاۆلودار قالا تۇرعىندارى مەن قوناقتارىن تاعى دا تاڭعالدىردى: اكىمدىكتىڭ قولداۋىمەن وتكەن LowKZMeet اۋقىمدى اۆتوفەستيۆالى قازاقستاننىڭ تۇكپىر-تۇكپىرىنەن 150-دەن استام ەكسكليۋزيۆتى اۆتوكولىكتى جانە ونداعان مىڭ كورەرمەندى جينادى. ادەتتە اقىلى بولاتىن ءىس-شاراعا كىرۋ بيىل بارلىق قوناقتارعا تەگىن بولدى، دەپ حابارلايدى infohub.kz سايتى.
LowKZMeet قازاقستاندا ون جىلدان بەرى وتكىزىلىپ كەلەدى. ۇيىمداستىرۋشىلاردىڭ ايتۋىنشا، فەستيۆال باستاپقىدا ستيحيالى تۇردە پايدا بولعان: ءبارى زاڭسىز باستالعان، ءبىراق ۋاقىت وتە كەلە ءىس-شارا جارقىن اۆتوكولىك شوۋلارىن سۇيەتىندەر ءۇشىن ۇلكەن مەرەكەگە اينالدى.
«10 جىل ىشىندە العاش رەت اۆتوفەستيۆال پاۆلوداردا قالا اكىمدىگىنىڭ قولداۋىمەن ءوتىپ جاتىر. ءتىپتى قالا اكىمى حاسار حابىلبەكوۆتىڭ باستاماسىمەن دەپ ايتار ەدىم. ءىس-شاراعا قازاقستاننىڭ ءارتۇرلى ايماقتارىنان 150-دەن استام جارقىن ءارى ەكسكليۋزيۆتى كولىك جينادىق. قاتىسۋشىلار ءوز كولىكتەرىن، جۇرگىزۋ شەبەرلىكتەرىن كورسەتۋ ءۇشىن كەلدى. سونىڭ ىشىندە بارلىق قوناقتارعا دريفت-تاكسي ۇيىمداستىرعان كاسىبي دريفتەرلەر دە بار»، — دەدى LowKZMeet اۆتوفەستيۆالىنىڭ نەگىزىن قالاۋشىسى ءارى باس ۇيىمداستىرۋشىسى دارحان يسكاكوۆ.
ۇيىمداستىرۋشىلار فەستيۆالدىڭ بىرنەشە ماقساتى بارىن اتاپ وتەدى. ەڭ الدىمەن، بۇل كەلۋشىلەرگە ارنالعان جارقىن شوۋمەن ۇلكەن مەرەكە ۇيىمداستىرۋ. ءىس-شاراعا حالىقتىڭ ءارتۇرلى توپتارى قىزىعۋشىلىق تانىتادى. سونىمەن قاتار، سپورتشىلار مۇندا قالا كوشەلەرىندە ەرەجە بۇزباي-اق «بۋىن شىعارا» الادى. جۇرگىزۋ مادەنيەتىن ناسيحاتتاۋ جانە جول قوزعالىسى ەرەجەلەرىن ساقتاۋ — فەستيۆالدىڭ باستى مىندەتتەرىنىڭ ءبىرى.
پاۆلودارلىق سپورتشىلار جىل سايىن باسقا قالالارداعى وسىنداي شوۋلارعا قاتىسادى. پاۆلوداردا ناعىز شوۋ كورسەتە الاتىن كاسىبي دريفتەرلەر از ەمەس. LowKZMeet-كە 9 جاسىنان بەرى كولىك تىزگىندەپ كەلە جاتقان 17 جاستاعى تەمىرلان قاتىستى. جىگىت كورەرمەندەردى ءوزىنىڭ باسقارۋ شەبەرلىگىمەن تاڭعالدىرىپ، كوپشىلىك سياقتى BMW-دە ەمەس، «جيگۋليدە» دريفت-شوۋ كورسەتتى.
«جەرگىلىكتى جارىستارعا قاتىسامىن: دريفت، دريفت-تاكسي، راللي، قىسقى دريفت — بارلىعىنا قاتىسۋعا تىرىسامىن. ازىرگە جۇرگىزۋشى كۋالىگىم جوق، تەك وسىندا ارنايى الاڭداردا جۇرۋىمە رۇقسات. اكەم مەنى قولداپ، الىپ كەلەدى. كولىكتى ءوزىم جينادىم»، — دەدى پاۆلودارلىق تەمىرلان سەيتكازينوۆ.
فەستيۆالدە بىرنەشە الاڭ جۇمىس ىستەدى: سيرەك كەزدەسەتىن كولىكتەر كورمەسى، بالالار ايماعى، PlayStation ويىندارى. قوناقتار دريفت-تاكسيگە وتىرا الدى. بۇل يدەيانى پاۆلودار وبلىسىنىڭ اكىمى اسايىن بايحانوۆ تا قولدادى، ول دا دريفت-شوۋدا جولاۋشى بولدى.
«ۇيىمداستىرۋشىلارعا، كەشتىڭ حەدلاينەرلەرى — Omerta بىرلەستىگىنە، قاتىسۋشىلارعا جانە قازاقستاننىڭ ءارتۇرلى قالالارى مەن باسقا ەلدەردەن كەلگەن بارلىق قوناقتارعا راحمەت. سىزدەر پاۆلودارلىقتارعا جارقىن مەرەكە، كەرەمەت كوڭىل-كۇي جانە ۇمىتىلماس ەموسيالار سىيلادىڭىزدار»، — دەدى پاۆلودار قالاسىنىڭ اكىمى حاسار حابىلبەكوۆ.
اۆتوفەستيۆال اياسىندا ستريتبول جانە FIFA 2026 تۋرنيرلەرى دە ءوتتى. ءىس-شارا كۇنى بويى جالعاسىپ، ونداعان مىڭ پاۆلودارلىق پەن قالا قوناقتارىن جيناپ، جازدىڭ ەڭ جارقىن وقيعالارىنىڭ بىرىنە اينالدى.
ادەتتە فەستيۆال اقىلى وتەدى، بيلەت باعاسى 8–10 مىڭ تەڭگەدەن باستالادى. الايدا پاۆلوداردا ءبارى اكىمدىك پەن دەمەۋشىلەردىڭ قولداۋىمەن ۇيىمداستىرىلدى. مەرەكەنىڭ حەدلاينەرلەرى Truwer، Niman، Captown جانە ەكسي بولدى.