پاۆلودارداعى جالپى ءبىلىم بەرەتىن مەكتەپتەردىڭ بىرىندە شاتىر ورتەندى. تجم ناقتىلاعانداي، قازا تاپقاندار مەن زارداپ شەككەندەر جوق، دەپ حابارلايدى infohub.kz سايتى.
وقيعا ورنىنا كەلگەن ءورت سوندىرۋشىلەر ءپروفيلدى جابىننىڭ استىندا جىلۋ وقشاۋلاعىشتىڭ جانعانىن انىقتادى. الدىن الا بولجام بويىنشا، ءورت شاتىر جۇمىستارى جۇرگىزىلىپ جاتقان كەزدە شىققان.
قۇتقارۋشىلار كەلگەنگە دەيىن عيماراتتان ون شاقتى ادام وزدىگىمەن كەتىپ ۇلگەردى.
ءورت سوندىرۋشىلەر جالىننىڭ شاتىردىڭ بۇكىل اۋماعىنا تارالۋىنا جول بەرمەدى. ءورتتى ءسوندىرۋدى شاتىردىڭ قۇرىلىمى قيىنداتتى: مەتالل قاڭقاسى قوس توبە پرينسيپىمەن جاسالعان، ال شاتىردىڭ ءوزى ەكى جاعىنان ءپروفيلدى جابىنمەن قاپتالعان. وشاق قۇرىلىمنىڭ ىشىندە بولعاندىقتان، ونى تابۋ قيىنعا سوقتى.
جاسىرىن ءورت وشاقتارىن تابۋ ءۇشىن ءورت سوندىرۋشىلەر تەپلوۆيزوردى قولدانىپ، سۋدى تىكەلەي جانۋ ورنىنا بەرۋ ءۇشىن شاتىردىڭ جەكە بولىكتەرىن اشتى.
تجم ءورت قاۋىپسىزدىگى ەرەجەلەرىن ساقتاۋ قاجەتتىگىن ەسكەرتىپ، توتەنشە جاعداي تۋىنداعان كەزدە 112 نومىرىنە قوڭىراۋ شالۋدى سۇرادى.
بۇعان دەيىن «كۋرسيۆ» باسىلىمى 26 شىلدەدە پاۆلوداردا توعىز قاباتتى ءۇيدىڭ جەتىنشى قاباتىنداعى پاتەردە ءورت بولعانىن حابارلاعان. كىرەبەرىستەن 20 ادام، ونىڭ ىشىندە بەس بالا وزدىگىمەن ەۆاكۋاسيالاندى. 25 شارشى مەتر اۋماقتى قامتىعان ءورت ءسوندىرىلدى، زارداپ شەككەندەر بولعان جوق.