پاۆلودار وبلىسىنداعى ادەپ كەڭەسىنىڭ وتىرىسىندا ۋسپەن اۋدانى اكىمىنىڭ بۇرىنعى ورىنباسارىنا، جەر قاتىناستارى ءبولىمىنىڭ باسشىسىنا جانە لوزوۆ اۋىلدىق وكرۋگىنىڭ اكىمىنە قاتىستى تارتىپتىك ءىس قارالدى. وعان جەر ۋچاسكەلەرىن بەرۋ كونكۋرسىندا باللداردى زاڭسىز ەسەپتەۋ سەبەپ بولدى، دەپ حابارلايدى infohub.kz سايتى.
irbistv.kz مالىمەتىنشە، تەرگەۋگە تارتىلعانداردىڭ ءبىرى — بۇرىن ۋسپەن اۋدانى اكىمىنىڭ ورىنباسارى قىزمەتىن اتقارعان، ءقازىر پاۆلودار اۋدانىندا سول قىزمەتتە جۇرگەن تالعات بەششەنبايەۆ. ونىمەن بىرگە ادەپ كەڭەسىندە جەر قاتىناستارى ءبولىمىنىڭ باسشىسى مەن لوزوۆ اۋىلدىق وكرۋگىنىڭ اكىمى جاۋاپ بەردى.
تەكسەرۋگە فەرمەرلىك شارۋاشىلىق جەتەكشىسىنىڭ تالاپ ارىزى نەگىز بولعان. ول سوتقا جۇگىنىپ، جەر بەرۋ لوتى بويىنشا باسەكەلەستەرىنە 10 باللدان زاڭسىز قوسىلعانىن، سونىڭ سالدارىنان كونكۋرستا جەڭىلگەنىن دالەلدەدى. جەر كوميسسياسىنىڭ شەشىمى كۇشى جويىلىپ، پروكۋرورلار تارتىپتىك ءىس قوزعادى.
«بۇل كونكۋرستا لوت بويىنشا 8 قاتىسۋشى بولدى: ۇشەۋى — زاڭدى تۇلعالار، بەسەۋى — جەكە تۇلعالار. جەكە تۇلعالاردىڭ بارلىعىنا اۋدان تۇرعىندارى بولعاندىقتان 10 باللدان بىردەي قوسىلدى، الايدا سوت شەشىمىندە اۋىلدىق وكرۋگ دەپ كورسەتىلگەن. ەرەجەلەر مەن جەر كودەكسىندە، تەك ءبىزدىڭ وبلىستا ەمەس، بۇكىل رەسپۋبليكا بويىنشا بارلىق كونكۋرستاردا اۋدان تۇرعىندارىنا 10 بالل قوسۋ قاراستىرىلعان»، — دەپ ءتۇسىندىردى پاۆلودار اۋدانى اكىمىنىڭ ورىنباسارى تالعات بەششەنبايەۆ.
ادەپ كەڭەسىنىڭ وتىرىسىندا مامان تىڭدالىپ، ول جەر تەلىمىن ءبولۋ كەزىندە باسىمدىق 5 جىل بويى ۋچاسكەگە تىكەلەي جاقىن تۇراتىن ادامعا بەرىلەتىنىن ءتۇسىندىردى. سوندىقتان سوت شەشىمى نەگىزدى دەپ تانىلىپ، شەنەۋنىكتەردىڭ جالپى ۋسپەن اۋدانىنىڭ تۇرعىندارىنا قوسىمشا بالل قوسۋعا قۇقىعى بولماعان.
بارلىق شەنەۋنىكتەر تارتىپتىك ءىستى تەرگەۋ بارىسىندا كىناسىن مويىندادى. ولارعا تولىق ەمەس قىزمەتتىك سايكەستىك تۇرىندەگى جازا تاعايىنداۋ ۇسىنىلدى.