پاۆلودار تۇرعىنى جالپى پايدالانۋداعى جەردى جەكە مەنشىككە بەرۋ تۋرالى شەشىمنىڭ كۇشىن جويدى. اكىمشىلىك ىستەر جونىندەگى كاسساسيالىق سوت قالا تۇرعىنىنىڭ بىرىنە قوسىمشا جەر ۋچاسكەسىن بەرۋدىڭ زاڭدىلىعى تۋرالى داۋدى قارادى، دەپ حابارلايدى infohub.kz سايتى.
كورشى ۋچاسكەنىڭ يەسى سوتقا جۇگىنىپ، داۋلى اۋماق جالپى پايدالانۋداعى جەرگە جاتاتىنىن، وندا ينجەنەرلىك كوممۋنيكاسيالار ورنالاسقانىن جانە تۇراق جابدىقتالعانىن كورسەتتى. ول اكىمدىكتىڭ قاۋلىسىنا داۋ ايتىپ، ونىڭ زاڭنامانى بۇزا وتىرىپ شىعارىلعانىن مالىمدەدى.
ءبىرىنشى جانە اپەللياسيالىق ساتىلارداعى سوتتار تالاپتى قاناعاتتاندىرۋدان باس تارتتى، الايدا كاسساسيالىق ساتى كەرىسىنشە قورىتىندىعا كەلدى. سوت اكىمدىك قاۋلىسى قابىلدانعان كەزدە جەر ۋچاسكەسى شىنىمەن جالپى پايدالانۋداعى جەرگە جاتقانىن، ونىڭ مارتەبەسىن وزگەرتۋ ءراسىمى جۇرگىزىلمەگەنىن، ال ۋچاسكەنى بەرۋ كەلىسىلگەن كەزدە جەر زاڭناماسىنىڭ تالاپتارى ساقتالماعانىن انىقتادى. سونىمەن قاتار، تومەنگى ساتىداعى سوتتار ينجەنەرلىك كوممۋنيكاسيالاردىڭ بولۋىنا جانە ءىستىڭ باسقا دا ماڭىزدى ءمان-جايلارىنا ءتيىستى باعا بەرمەگەن.
كاسساسيالىق سوت مەملەكەتتىك ورگان شەشىمىنىڭ زاڭدىلىعى ول قابىلدانعان كەزدە قولدانىستا بولعان زاڭناماعا سايكەس باعالانۋى ءتيىس ەكەنىن اتاپ ءوتتى. سەنىمدى قورعاۋ ءپرينسيپى زاڭعا قايشى كەلەتىن ارەكەتتەردى اقتاي المايدى.
قاراۋ ناتيجەسىندە كاسساسيالىق سوت تومەنگى ساتىداعى سوت اكتىلەرىن جويىپ، تالاپتى قاناعاتتاندىرىپ، اكىمنىڭ جەر ۋچاسكەسىن بەرۋ تۋرالى قاۋلىسىن زاڭسىز دەپ تانىدى.