پاۆلوداردا جاس انا بيىكتىكتەن قۇلاعان مۇز كەسەگىنەن باس جاراقاتىن الدى. ول بالاسىن اربامەن سەرۋەندەتىپ جۇرگەن كەزدە وقيعا بولدى. پوليسيا قىلمىستىق ءىس قوزعادى، دەپ حابارلايدى infohub.kz سايتى.
Kerek.pv Telegram-ارناسىنىڭ مالىمەتىنشە، وقيعا 8 شىلدەدە نازاربايەۆ داڭعىلىنداعى ءۇيدىڭ ماڭىندا بولعان. جاريالانعان ۆيدەودان زارداپ شەككەن ايەلدىڭ باسىنداعى جارانى تىگۋگە تۋرا كەلگەنى كورىنەدى. تۋىستارىنىڭ ايتۋىنشا، كىنالى ءالى تابىلماعان، ولار تەرەزەدەن مۇز تاستاعان ادامدى ءوز بەتىنشە ىزدەپ ءجۇر. جاريالانىم اۆتورلارى مۇز كەسەگىنىڭ قۇلاعان پاتەرى پوليسيا قىزمەتكەرلەرىنىڭ ءبىرىنىڭ تۋىستارىنا تيەسىلى بولۋى مۇمكىن ەكەنىن دە مالىمدەدى.
پاۆلودار وبلىسى پوليسيا دەپارتامەنتى وقيعاعا قاتىستى پىكىر ءبىلدىردى: «دەنساۋلىققا قاساقانا جەڭىل زيان كەلتىرۋ فاكتىسى بويىنشا پوليسيا قىلمىستىق ءىس قوزعادى. پوليسيا قىزمەتكەرلەرى بەينەباقىلاۋ كامەرالارىنىڭ جازبالارىن الىپ، زەردەلەدى، كۋاگەرلەردەن سۇراستىرىلدى، سونداي-اق باسقا دا قاجەتتى تەرگەۋ شارالارى جۇرگىزىلدى. بەينەجازبادا زاتتىڭ زارداپ شەككەن ايەلگە قۇلاعان ءساتى تىركەلگەن».
قازىرگى ۋاقىتتا پوليسەيلەر بولعان وقيعانىڭ بارلىق ءمان-جايىن انىقتاپ، وقيعاعا قاتىسى بار ادامدى انىقتاۋدا. تەرگەۋ وڭىرلىك پوليسيا دەپارتامەنتى باسشىلىعىنىڭ ەرەكشە باقىلاۋىندا.