پەكيندە «دەلفين» تايفۋنىنىڭ جاقىنداۋىنا بايلانىستى جاپپاي ەۆاكۋاسيا جاريالاندى. سينوپتيكتەر جۇڭگو استاناسىنا رەكوردتىق مولشەردە جاۋىن-شاشىن ءتۇسۋى مۇمكىن ەكەنىن بولجاپ وتىر، دەپ حابارلايدى infohub.kz سايتى.
«دەلفين» تايفۋنى قىتايدىڭ سولتۇستىك جانە ورتالىق ايماقتارىندا نوسەرلى جاڭبىر تۋدىرۋىن جالعاستىرۋدا. وسىعان بايلانىستى پەكيننىڭ مىڭداعان تۇرعىنى سۋ تاسقىنى مەن كوشكىن ءقاۋپى بار اۋدانداردان ەۆاكۋاسيالاندى. مەتەورولوگتاردىڭ بولجامىنشا، الداعى 24 ساعاتتا استانادا 150 ميلليمەتردەن استام جاۋىن-شاشىن ءتۇسۋى مۇمكىن، ال كەيبىر اۋدانداردا 200 ميلليمەتردەن اسادى. بۇل پەكيندەگى جىلدىق ورتاشا جاۋىن-شاشىن مولشەرىنىڭ (528 ميلليمەتر) ۇشتەن بىرىنەن استامىن قۇرايدى.
سارسەنبىدە پەكيندە نوسەرلى جاڭبىرعا بايلانىستى قاۋىپتىلىك دەڭگەيى بويىنشا ەكىنشى ورىندا تۇرعان سارى ەسكەرتۋ جاريالاندى. قالا كەزەكتى قاتتى جاڭبىرعا دايىندالۋدا: 6300-دەن استام نوسەر سۋى اعىندارى تازارتىلىپ، 252 سۋ تاسقىنىنا قارسى توپ دايىندىققا كەلتىرىلدى. سۋ باسۋ ءقاۋپى جوعارى ايماقتارعا سورعىلار ورناتىلۋدا.
«دەلفين» تايفۋنى چجەسزيان پروۆينسياسىنداعى اۋىلدار مەن اۋىل شارۋاشىلىعى جەرلەرىن سۋ استىندا قالدىرعانى حابارلاندى. پەكين بيلىگى جۇزدەگەن تۋريستىك ورىندار مەن كەمپينگتەردى جاۋىپ تاستادى، 1300-دەن استام تۋريست ەۆاكۋاسيالاندى نەمەسە قالاعا كىرۋگە رۇقسات بەرىلمەدى. سونىمەن قاتار، 5 مىڭنان استام قارت ادام قارتتار ۇيىنەن كوشىرىلدى، ال تاۋلى نەمەسە جاعالاۋ ايماقتارىنداعى قۇرىلىس الاڭدارىنىڭ ماڭىندا تۇراتىن 1800-گە جۋىق ادام دا ەۆاكۋاسيالاندى.
ەسكە سالايىق، بۇعان دەيىن «دەلفين» تايفۋنى قىتايدىڭ شىعىس جاعالاۋىنا جەتىپ، حالىق تىعىز قونىستانعان اۋداندارعا سوققى بەرگەنى حابارلانعان بولاتىن. تايفۋنمەن بايلانىستى نوسەرلى جاڭبىر ەلدىڭ ەداۋىر بولىگىنە اسەر ەتۋىن جالعاستىرۋدا، بۇل سۋ تاسقىنىنا قارسى شارالاردىڭ كۇشەيتىلۋىنە، پويىزدار قوزعالىسىنىڭ توقتاتىلۋىنا جانە پەكين مەن كورشىلەس تيانسزيندە، سونداي-اق ورتالىق جانە شىعىس پروۆينسيالاردا سۋ تاسقىنى تۋرالى ەسكەرتۋلەرگە سەبەپ بولۋدا.